ថ្មីៗកន្លងទៅនេះ មហាជនអ្នកគាំទ្ររបស់ពិធីការិនី សុភ័ក្រ្ត កុសុម៉ា បានផ្ទុះចាប់អារម្មណ៍ចែករំលែកនូវវីដេអូខ្លីៗដែលពិធីការិនីរូបនេះ បាននិយាយក្នុងកិច្ចសម្ភាសមួយ ចែករំលែកទាក់ទងនឹងរឿងរ៉ាវ បទពិសោធន៍លើវិស័យសិល្បៈរបស់នាង ក៏ដូចជាជីវិតឯកជនផ្សេងៗ។
ក្នុងនោះ អ្វីដែលធ្វើឱ្យមហាជនចាប់អារម្មណ៍ និង សរសើរ ពីការលើកនិយាយរបស់ពិធីការិនី កុសុម៉ា ខណៈនាងបានរៀបរាប់ពីបុគ្គលសំខាន់ៗនៅពីក្រោយភាពជោគជ័យក្នុងវិថីសិល្បៈ ដោយក្នុងនោះនាងបានបង្ហាញការដឹងគុណដល់ពិធីកររូបសង្ហា តាប៊ុយ ដែលចាត់ទុកជាអ្នកមានគុណមួយរូបក្នុងជីវិតរបស់នាង ធ្លាប់ផ្ដល់ឱកាសក្នុងអាជីពពិធីករ និង ជាបុគ្គលដំបូងបំផុតបានឱ្យនាងក្លាយជាពិធីការិនីដ៏មានប្រជាប្រិយភាពមួយរូបមកដល់សព្វថ្ងៃ។
ចំពោះវីដេអូនៃការនិយាយដឹងគុណរបស់ សុភ័ក្រ្ត កុសុម៉ា នេះដែរ ក្រៅពីមហាជនចាប់អារម្មណ៍សរសើរ ក៏បានឃើញពិធីការិនីរៀមច្បង គឺអ្នកនាង កែវ ចាន់និមល ក៏បានចែករំលែក និង បញ្ចេញមតិលើកសរសើរពេញៗមាត់ពីអត្តចរិតដ៏ល្អជាច្រើនរបស់សិស្សប្អូន កុសុម៉ា ផងដែរ។
ក្នុងនោះ អ្នកនាង កែវ ចាន់និមល បានរៀបរាប់ថា ៖ «ខ្ញុំហ៊ាននិយាយថា ខ្ញុំមិនងាយ Share ចេញពីផេកទេ! តែម្តងនេះ គឺខ្ញុំពិតជាចង់បង្ហាញថាមនុស្សស្រីម្នាក់នេះ មានបេះដូងដ៏កម្រមួយ ស្មោះត្រង់ គោរព ផ្តល់តម្លៃ ដល់អ្នកគ្រប់គ្នាជុំវិញខ្លួនគាត់ ជាមនុស្សដែលកត់ចំណាំតែរឿងល្អៗ ឬក៏អាចនិយាយបានថាជាមនុស្សដែលវិជ្ជមានជានិច្ច Love n respect my lovely sis Sopheak Kosoma»៕
