នាពេលថ្មីៗនេះ មហាជនអ្នកប្រើប្រាស់បណ្ដាញសង្គម បាន និង នាំគ្នាសម្ដែងក្ដីអាណិតអាសូរ បន្ទាប់ពីបានដឹងរឿងរ៉ាវមួយរបស់កញ្ញា ហ៊ឺន ស្រីនីត ដែលបានបញ្ចប់ការសិក្សាផ្នែកពេទ្យ ប៉ុន្តែបែរជាកើតជំងឺខូចតម្រងនោម ត្រូវលាងឈាមក្នុងមួយសប្ដាហ៍ ២ ដង។
មកដល់ពេលនេះ រឿងរ៉ាវរបស់កញ្ញា ហ៊ឺន ស្រីនីត នៅតែកំពុងផ្ទុះការអាណិតអាសូរនៅឡើយពីក្នុងចង្កោមអ្នកលេងហ្វេសប៊ុក និង មហាជនជាច្រើន។ យ៉ាងណាមិញ តាមរយៈការផ្ដល់កិច្ចសម្ភាសជាមួយផេក Romdoul TV ដែលលោក បូ ភ័ក្ត្រា បានទៅសម្ភាសដល់បន្ទប់ជួលរបស់កញ្ញាបានបង្ហាញថា បច្ចុប្បន្ននេះកញ្ញា ហ៊ឺន ស្រីនីត និង ម្ដាយ កំពុងរស់នៅក្នុងបន្ទប់ជួលមួយយ៉ាងកម្សត់។ ក្នុងនោះ កញ្ញា ហ៊ឺន ស្រីនីត បានរៀបរាប់ថា ខ្លួនត្រូវលាងឈាមក្នុងមួយសប្ដាហ៍ ២ ដង និង បានឈឺជំងឺនេះអស់រយៈពេលប្រមាណ ២ ឆ្នាំមកហើយ ពោលគឺតាំងពីឆ្នាំ ២០២២ ដោយក្នុងអំឡុងពេលព្យាបាលជំងឺនេះ កញ្ញាបានបប្រាប់ថាម្តាយបានលក់ទ្រព្យសម្បត្តិកេរមរតកនៅស្រុកកំណើតនាខេត្តកំពង់ស្ពឺអស់ ដើម្បីព្យាបាលជំងឺឱ្យខ្លួន និង ពេលនេះគឺកំពុងអស់លទ្ធភាពទៀតហើយ។
អ្វីដែលកាន់តែរំជួលចិត្តទៀតនោះ ដោយសារត្រូវលាងឈាមក្នុងមួយសប្ដាហ៍ ២ ដង ធ្វើឱ្យយុវតីពុំអាចរកចំណូល ឬ ធ្វើការបំពេញការងារអ្វីមួយបានឡើយ ទើបជំហរដ៏ធំបំផុតនោះ គឺធ្លាក់ទៅលើម្ដាយ ដែលដើម្បីឱ្យកូនស្រីបានរស់នៅមើលមុខគ្នាបន្តទៀត គាត់ត្រូវធ្វើការងារក្នុងមួយថ្ងៃ ២ កន្លែង ដោយពេលព្រឹកបំពេញការងារជាអ្នកសម្អាតនៅតារាងបាល់ឱ្យគេ និង ធ្វើជាអ្នកលាងចាននៅភោជនីយដ្ឋានមួយកន្លែងទៀតផងដែរ។
ដោយសារពេលនេះស្ថានភាពជំងឺកាន់តែទៅមុខ ហើយមានវិធីមួយដើម្បីរស់បន្ត កញ្ញា ហ៊ឺន ស្រីនីត និង ម្តាយបានបន្តឱ្យដឹងតាមកិច្ចសម្ភាសថា គឺមានតែការប្តូរករលៀនប៉ុណ្ណោះទើបអាចស្រោយស្រង់ជីវិតនាងបាន ប៉ុន្តែយ៉ាងណានាង និង ម្តាយគ្មានលទ្ធភាពឡើយ ព្រោះថ្លៃចំណាយលើការវះកាត់ប្តូរនោះមានខ្ទង់ខ្ពស់មានប្រមាណរហូតដល់ ៥ ទៅ ៦ ម៉ឺនដុល្លារ ហើយការប្តូរនោះទៀតសោត ត្រូវទៅប្តូរនៅប្រទេសឥណ្ឌាថែមទៀត។
តាមរយៈកិច្ចសម្ភាសនោះកញ្ញា ហ៊ឺន ស្រីនីត និង ម្តាយបានលើកដៃសំពះអំពាវនាវដល់ថ្នាក់ដឹកនាំប្រទេស និង មហាជន ដើម្បីជួយស្រោចស្រង់ជីវិតនាងក្នុងគ្រានេះផង ព្រោះនាងមិនទាន់ចង់ចាកចេញដោយមិនទាន់បានសងគុណម្តាយ និង ធ្វើការបម្រើសង្គមនៅឡើយនោះទេ។
គួររំឭកផងដែរថា កាលពីឆ្នាំ ២០១៩ កន្លងទៅ មុននឹងកើតជំងឺខូចតម្រងនោមនេះ កំឡុងពេលជំងឺកូវីដ-១៩ កំពុងរាតត្បាតនៅលើពិភពលោក និង នៅកម្ពុជា យុវតី ហ៊ឺន ស្រីនីត ក៏ធ្លាប់បានចូលរួមចំណែកជួយសង្គមជាតិ ជាគ្រូពេទ្យស្ម័គ្រចិត្តជួយព្យាបាលជំងឺកូវីដ-១៩ ដល់បងប្អូនប្រជាពលរដ្ឋ នៅ The Premiere SensokII រាជធានីភ្នំពេញផងដែរ៕
