អ្នកនិយមលេងបណ្តាញសង្គមនានា ជាពិសេស អ្នកលេងបណ្តាញសង្គមហ្វេសប៊ុកច្បាស់ជាបានជ្រាបហើយ នូវរឿងរ៉ាវជាបន្តបន្ទាប់ ដែលកើតមានឡើងនៅក្នុងរង្វង់សិល្បៈ បុគ្គលល្បីៗ ទាំងរឿងល្អ និង រឿងរកាំរកូសជាដើម ដោយបង្កជាការផ្ទុះចែករំលែក វែកញែក ឈ្លោះប្រកែកពេញបណ្តាញសង្គម។
យ៉ាងណាមិញ ស្របពេលរឿងរ៉ាវខាងលើនៅមិនទាន់ស្ងប់ កាលពីប៉ុន្មានថ្ងៃមុន អ្នកនាង ខាត់ សុឃីម បានបង្ហោះសារមួយម្តងហើយ ថាស្រុកទេសកំពុងមានគេបំពាន ម្តេចមកឈ្លោះ អ៊ីចឹង?។ ម្យ៉ាងវិញទៀត ការផ្ទុះការតតាំងតាមរយៈបណ្តាញសង្គមរបស់អ្នកសិល្បៈនៅតែបន្តមាន អ្នកនាង ខាត់ សុឃីម ក៏បានបង្ហោះសារថ្មីមួយទៀត សំណូមពរឱ្យប្អូនៗសិល្បៈ និង អ្នកពាក់ព័ន្ធណាត់ជួបគ្នានៅខាងក្រៅ ដើម្បីដោះស្រាយ ព្រោះឃើញថា កាន់តែក្តៅទប់លែងជាប់។
អ្នកនាង ខាត់ សុឃីម បានរៀបរាប់ថា៖ «ក្នុងនាមអ្នកសិល្បៈ និង ពលរដ្ឋ មួយរូប សូមសំណូមពរ ប្អូនៗ សិល្បៈ ក៏ដូចជាប្អូនៗ ដែលពាក់ព័ន្ធក្នុងជម្លោះទាំងអស់ ណាត់គ្នាជួបខាងក្រៅ រកខុសត្រូវ ដោះស្រាយទៅ ព្រោះខ្ញុំឃើញថា កាន់តែក្តៅ ទប់លែងជាប់រៀងខ្លួនហើយ។ អ្នកទាំងអស់គ្នា សុទ្ធតែមានឥទ្ធិពល ទេពកោសល្យ អាចធ្វើឱ្យអ្នកគាំទ្រ សើច យំ សប្បាយ ខឹង តាមបាន។ ក្នុងអ្នកគាំទ្រនោះ ក៏មានបងម្នាក់ដែរ ដូច្នេះ សូមប្អូនៗទាំងអស់ បើអាចបញ្ចប់បាន គួរតែបញ្ចប់ទៅ ។ ជាពិសេស កម្មពិធីសម្ភាសន៍អ្នកសិល្បៈ ទាំងអស់ មេត្តាអធ្យាស្រ័យ សម្រួលសំណួរ ឬកាត់ចោលខ្លះទៅនូវសំណួរណា ដែលអាចបង្កឱ្យមានបញ្ហា ដល់សង្គម និង អ្នកដទៃ។ បងគោរពស្រលាញ់ប្អូនៗ និង ទទួលស្គាល់ សមត្ថភាព ទាំងអស់គ្នា ថាជាធនធានល្អ អាចជួយឱ្យសិល្បៈខ្មែរ បានរីកចម្រើនបន្ថែមទៀត។ ពីនាងខ្ញុំ ខាត់ សុឃីម»៕
