ក្រោយពីបានរកឃើញ ស្ត្រីខ្លាំងក្លាយទៅជាម្ចាស់មកុដ Miss Universe Cambodia ប្រចាំឆ្នាំ ២០២៥ កាលពីរាត្រីថ្ងៃទី ១២ ខែកញ្ញា ឆ្នាំ ២០២៥ កន្លងទៅ ដើម្បីតំណាងកម្ពុជាទៅប្រកួតលើឆាកអន្តរជាតិហើយនោះ មហាជនអ្នកស្នេហាវិស័យបវរកញ្ញាកំពុងតែចូលរួមអបអរសាទរនឹងលទ្ធផលរបស់ម្ចាស់មកុដឆ្នាំថ្មី គឺអ្នកនាង ថៃ នារីសុជាតា។
ក្នុងលទ្ធផលនេះដែរ បានធ្វើឱ្យអ្នកគាំទ្រកម្មវិធី Miss Universe Cambodia ទាំងជាតិ និង អន្តរជាតិបង្ហាញក្តីរំភើប និង ការពេញចិត្តយ៉ាងខ្លាំងនូវសមត្ថភាពដ៏អស្ចារ្យ និង ស័ក្តិសមរបស់ម្ចាស់មកុដ Miss Universe Cambodia 2025 រូបនេះយ៉ាងខ្លាំង។
ដោយឡែក ក្រៅពីការសាទររបស់អ្នកគាំទ្រនោះ មហាជនក៏បានចាប់អារម្មណ៍នឹងវត្តមានរបស់ក្រុមគ្រួសារអ្នកនាង ថៃ នារីសុជាតា នៅថ្ងៃប្រកួត ជាពិសេស គឺលោកជំទាវ ងិន ម៉ានីយ៉ា អ្នកម្តាយរបស់ Miss Universe Cambodia 2025 ដែលបានអញ្ជើញទៅលើកទឹកចិត្តកូនស្រីទាំងខ្លួនកំពុងឈឺផងនោះ។
ក្នុងនោះដែរ សូម្បីតែអ្នកនាង ងិន ម៉ារ៉ាឌី Miss Universe Cambodia 2021 ក៏បានបង្ហាញអារម្មណ៍រំភើបពីទឹកចិត្តនៃក្តីស្រឡាញ់របស់លោកជំទាវ ងិន ម៉ានីយ៉ា ទៅកាន់អ្នកនាង ថៃ នារីសុជាតា និង បានធ្វើឱ្យអ្នកនាង ងិន ម៉ារ៉ាឌី នឹកដល់អ្នកម្តាយរបស់ខ្លួនកាលពេលនាងប្រកួត ថាម្តាយរំភើបដល់ថ្នាក់សន្លប់។
អ្នកនាង ងិន ម៉ារ៉ាឌី បានរំឭកថា៖ «គ្មានអ្នកស្រឡាញ់យើង ដូចម្តាយឪពុក និង ក្រុមគ្រួសារយើងទេ។ មើលហើយ នឹកឃើញម៉ាក់ខ្ញុំ កាលខ្ញុំប្រលងគាត់ អរឡើងសន្លប់ ចូលរួមអបអរសាទរផងម៉ាក់»៕
