ឃើញមិត្តភក្តិបានឡើងតំណែងការងារ កើតចិត្តច្រណែន លួចដាក់ថ្នាំពុលក្នុងទឹកឱ្យមិត្តផឹក

ថ្មីៗនេះ មានករណីដ៏មិននឹកស្មានមួយនៅប្រទេសប្រេស៊ីល ដែលមានស្រ្តីម្នាក់លួចដាក់ថ្នាំពុលក្នុងទឹកឱ្យមិត្តភក្តិផឹក ព្រោះតែច្រណែនរឿងមិត្តបានឡើងដំតំណែងនៅកន្លែងការងារ។

រឿងរ៉ាវនេះបានកើតឡើងនៅក្នុងរោងចក្រមួយកន្លែងនា Abadia de Goias ប្រទេសប្រេស៊ីល ដោយស្រ្តីជាជនបង្កហេតុមានវ័យ ៣៨ ឆ្នាំ។ តាមសាក្សីបានឱ្យដឹងថា ស្រ្តីរូបនេះ នឹងជនរងគ្រោះធ្លាប់ជាមិត្តភក្តិគ្នានៅកន្លែងធ្វើការ​ តែក្រោយមកក៏មានការឈ្លោះទាស់ទែងគ្នាខ្លាំង ដោយសារតែមិត្តរបស់នាងបានឡើងតំណែងការងារ។

មិនយូរប៉ុន្មានជនបង្កបានលួចចូលទៅក្នុងកន្លែងធ្វើការរោងចក្រ រួចលួចដាក់ថ្នាំអ្វីម្យ៉ាងនៅក្នុងទឹករបស់ជនរងគ្រោះ ដែលក្រោយមកនាងផឹកទៅក៏កើតជាក្តៅកឈឺផ្សា ហើយក៏ត្រូវបានគេបញ្ជូនទៅមន្ទីរពេទ្យ និង សង្រ្គោះបានសម្រេច។ តាមការត្រួតពិនិត្យបានឱ្យឃើញថា ក្នុងទឹកមានសារធាតុគ្រោះថ្នាក់ ដែលនេះបានបញ្ជាក់ថា នាងត្រូវមិត្តរួមការងារដាក់ថ្នាំ។ ដោយឡែក ស្រ្តីជាជនបង្កត្រូវបានប៉ូលិសឃាត់ខ្លួន និង ចោទប្រកាន់ពីបទព្យាយាមសម្លាប់ ដែលអាចនឹងត្រូវជាប់ពន្ធនាគារពី ៦ ឆ្នាំ ដល់ ២០ ឆ្នាំឯណោះ៕

ប្រភព​៖ Khaosod