ជាការពិតណាស់ ប៉ុន្មានថ្ងៃមកនេះ ប្រជាជនកម្ពុជាជាច្រើនបាន និង កំពុងមានការយកចិត្តទុកដាក់យ៉ាងខ្លាំងទៅកាន់កងទ័ពកម្ពុជា ដែលកំពុងឈរជើងនៅព្រំដែន ក្រោយពីការប៉ះទង្គិចគ្នារវាងកងទ័ពកម្ពុជា និង កងទ័ពថៃ ដែលបានកើតឡើងនៅព្រឹកថ្ងៃទី ២៨ ខែឧសភា ឆ្នាំ ២០២៥ នៅភូមិតេជោមរកត ឃុំមរកត ស្រុកជាំក្សាន្ត ខេត្តព្រះវិហារ កាលពីពេលកន្លងទៅ។
ក្នុងនោះដែរ គេក៏សង្កេតឃើញមានមហាជនជាច្រើនបានបន្តផ្តល់ថវិកា និង ជំនួយផ្សេងៗទៅដល់កងទ័ព ខណៈកងទ័ពបានធ្វើការចល័តកម្លាំង និង អាវុធទៅព្រំដែន ដើម្បីការអនុវត្តផែនការបម្រុង ក្នុងការការពារបូរណភាពទឹកដីកម្ពុជា។
យ៉ាងណាមិញ អ្វីដែលគួរឱ្យចាប់អារម្មណ៍ ក្រោយមានការចល័តកម្លាំង និង អាវុធទៅព្រំដែន ដើម្បីការអនុវត្តផែនការបម្រុង ក្នុងការការពារបូរណភាពទឹកដីកម្ពុជា ស្រាប់តែមានអ្នកលេងបណ្តាញសង្គមហ្វេសប៊ុកមួយចំនួន បានលើកយកពីសិល្បករ សិល្បការិនីជាច្រើន ដែលមានឈ្មោះក្នុងកងទ័ព ឱ្យចូលទៅបម្រើជួរកងទ័ពនាពេលនេះ។ ជាក់ស្តែង ក្រុមគ្រួសាររបស់ឧកញ៉ា ព្រាប សុវត្ថិ និង កូនៗ គឺត្រូវបានលើកជាប្រធានបទច្រើនជាងគេ។
ជុំវិញការលើកឡើងខាងលើនេះដែរ ស្រាប់តែគេបានឃើញគណនីហ្វេសប៊ុកឈ្មោះ Vibol Sok MaLa Kan បានចូលបញ្ចេញមតិនៅក្រោមសារមួយរបស់ឧកញ៉ា ព្រាប សុវត្ថិ ដោយរៀបរាប់ពីសិល្បករ សិល្បការិនី ដែលមានឈ្មោះជាកងទ័ពថា៖ «សូមអភ័យទោស ខ្ញុំសូមមានយោបល់តិចតួច ខ្ញុំមានអាយុ ៧០ ឆ្នាំ ហើយ។ ខ្ញុំកើតទាន់ សង្គមរាជានិយម (សម្តេចតាសីហនុ) សាធារណៈរដ្ឋ (លន់ណុល) សង្គមផ្តាច់ការ (ប៉ុលពត) រហូតមកសង្គមសព្វថ្ងៃ (សម្តេចតេជោហ៊ុនសែន) ក្នុងកងទ័ព តែងតែមានកងទ័ពយោធាភិរម្យ គឺមានគ្រប់ៗជំនាន់ កងទ័ពយោធាផ្នែកសិល្បៈ ពួកគាត់មិនមានបទពិសោធផ្នែកវាយជាមួយសត្រូវទេ តែគាត់មានបទពិសោធខាងផ្នែកសិល្បៈ រាំច្រៀងបំពេអារម្មណ៍ជូនដល់កងទ័ពជួរមុខសណ្តាប់ក្នុងពេលសម្រាកបំពេញភារកិច្ច។ សូមបងប្អូនត្រូវយល់ពាក្យថាសង្គ្រាមចិត្តសាស្ត្រ យោធាភិរម្យ សូម្បីជំនាន់ប៉ុលពលក៏មានសិល្បៈចម្រៀងដែរ។ បើខ្ញុំមានយោបល់ខុស សូមមេត្តាអភ័យទោសផង។ ខ្ញុំគិតថាត្រូវ តាំងពីបុរាណកាលមកដល់បច្ចុប្បន្ននេះ គឺមានយូរហើយ ដូចជាត្រែងទ័ពជាដើម បើសង្គមរាស្ត្រនិយម គឺមានជាអចិន្រ្តៃយ៍សម្រាប់បំពេអារម្មណ៍ក្នុងជួរកងទ័ព»។
ក្នុងនោះ សំណេរខាងលើរបស់គណនីហ្វេសប៊ុកឈ្មោះ Vibol Sok MaLa Kan ហាក់បានបញ្ជាក់ថា សិល្បករ សិល្បការិនី ដែលមានឈ្មោះក្នុងកងទ័ព ភាគច្រើន គឺជាយោធាភិរម្យ មិនមានបទពិសោធផ្នែកវាយជាមួយសត្រូវឡើយ។
ដោយឡែក ងាកមកកាន់ឧកញ៉ា ព្រាប សុវត្ថិ ឯណោះវិញ បច្ចុប្បន្ន ក៏មិនមានឈ្មោះក្នុងជួរកងទ័ពនោះឡើយ ដោយឧកញ៉ាបានសម្រេចលាលែងចេញពីក្រមខណ្ឌនៃកងយោធពលខេមរភូមិន្ទតាំងពីអំឡុងចុងឆ្នាំ ២០២៤ មកម្ល៉េះ៕
