ជាការពិតណាស់ មហាជននិយមតាមដានពីជីវិតឯកជនរបស់តារាចម្រៀង សុវត្ថ មុនីនាគ កូនប្រុសទី ២ របស់ ឧកញ៉ា ព្រាប សុវត្ថិ ច្បាស់ជាបានជ្រាបហើយថា ពេលនេះ លោក មុនីនាគ បាន និង កំពុងរស់នៅឯសហរដ្ឋអាមេរិក។ លើសពីនោះ លោកក៏កំពុងតែដើរតាមក្តីស្រមៃក្នុងវិថីសិល្បៈលើឆាកអន្តរជាតិ ដោយបច្ចុប្បន្ន លោកក៏បានប្តូរជាលើវិថីសិល្បៈហៅថា N.John ទៀតផង។
ជាក់ស្តែង ក្រោយបានចាកចេញទៅរស់នៅសហរដ្ឋអាមេរិក និង សិក្សាផ្នែករាំ ព្រមច្រៀងនៅឯ Millennium Dance Complex នៅរដ្ឋ Los Angeles នោះ លោក N.John ក៏បានបង្ហាញសមិទ្ធផលថ្មីហើយ ដោយលោកបានចេញ Album ចម្រៀងទោលរួចរាល់ដែរ។ ម្យ៉ាងវិញទៀត ថ្មីៗនេះ លោកក៏ទទួលបាន O-1B visa ដែលជាទិដ្ឋាការស្របច្បាប់ក្នុងនាមជាសិល្បករនៅសហរដ្ឋអាមេរិក បន្ទាប់ពីលោកទទួលបានជោគជ័យខ្ពស់ និង ការទទួលស្គាល់ក្នុងការខិតខំប្រឹងប្រែងច្នៃប្រឌិតនៃសិល្បៈរបស់លោកនៅទីនោះ។
ងាកមកកាន់ការផលិតបទចម្រៀងនៅលើទឹកដីសហរដ្ឋអាមេរិកឯណោះវិញ លោក N.John ទទួលបានការគាំទ្រ និង មតិរិះគន់ព្រមគ្នា ខណៈមានអ្នកខ្លះសរសើរពីសមត្ថភាពរបស់លោកលើឆាកអន្តរជាតិ និង ខ្លះទៀតបញ្ចេញមតិមិនល្អជាដើម។
យ៉ាងណាមិញ ជុំវិញការបញ្ចេញមតិរិះគន់លើលោក N.John នោះដែរ គេបានឃើញកញ្ញា អេននី ហ្សាម ក៏បានបង្ហោះសារបង្ហាញពីអារម្មណ៍របស់កញ្ញាថា៖ «អ្នកខ្លះចូលចិត្តស្តាប់បទភាសាបរទេស ដល់ខ្មែរយើងច្រៀងបទភាសាបរទេសរិះគន់ ទាំងបរទេសគេសរសើរថា ខ្មែរយើងអាចធ្វើបាន។ នេះជាអ្វី ដែលខ្មែរយើងធ្វើឡើង ដើម្បីមុខមាត់ប្រទេសជាតិ លើកស្ទួយសិល្បៈកម្ពុជាឈានទៅទូទាំងពិភពលោកឱ្យបានស្គាល់ Cambodia»៕
