ម្សិលមិញ ថ្ងៃទី ០៩ ខែ កញ្ញា ឆ្នាំ ២០២៥ គឺជាថ្ងៃបើកដំណើរការផ្លូវការនៃ ព្រលានយន្តហោះថ្មី ឬ អាកាសយានដ្ឋានអន្តរជាតិតេជោ។ ខណៈប្រជាជនខ្មែរកំពុងអបអរ និង រីករាយនឹងសមិទ្ធផលថ្មីជាប្រវត្តិសាស្ត្រ ទន្ទឹមគ្នានេះ ក្រឡេកទៅព្រលានចាស់វិញ ក៏បានបន្សល់ទុកនូវប្រវត្តិសាស្ត្រសំខាន់ៗ ដែលគួរចងចាំផងដែរ។
ជាក់ស្តែង តាមការបង្ហោះលើទំព័រហ្វេសប៊ុក Amazing Cambodia បានចែករំលែកនូវរូបភាព ក៏ដូចជាដំណាក់កាលប្រវត្តិសាស្ត្រ នៃព្រលានយន្តហោះពោធិ៍ចិនតុង។
«៦ រូបភាពនៃដំណាក់កាលប្រវត្តិសាស្រ្តនៃព្រលានយន្តហោះពោធិចិនតុង (សរសេរឱ្យត្រូវតាមអក្ខរាវិរុទ្ធ: ពោធិ៍ចិនតុង)
– អាកាសយានដ្ឋានពោធិចិនតុង មានប្រវត្តិកកើតតាំងពីឆ្នាំ ១៩២៤ ហើយក្រោយមក នាសម័យអាណានិគមជប៉ុន ១៩៤១-១៩៤៥ ត្រូវបានពង្រីកអភិវឌ្ឍ ត្រង់ទីតាំងដដែល (ដូចមានលើកឡើងតាមរយៈអក្សរសិល្ប៍រឿង “គូលីកំនែន”)។
– សំណង់អគារក្នុងបរិវេណព្រលានបច្ចុប្បន្ន ត្រូវបានស្ថាបនាធ្វើទំនើបកម្ម ចន្លោះឆ្នាំ ១៩៥៧ ដល់ ១៩៥៩។
– កាលបរិច្ឆេទសម្ពោធន៍ជាផ្លូវការ: ថ្ងៃទី ១៩ ខែមករា ឆ្នាំ ១៩៥៩
– នៅសម័យសាធារណរដ្ឋខ្មែរ ព្រលាននេះដើរតួនាទីយ៉ាងសំខាន់សម្រាប់ការដឹកជញ្ជូនស្បៀង និង គ្រឿងសព្វាវុធផ្សេងៗ ជាពិសេស ដើមខែមេសា ឆ្នាំ១៩៧៥ ក្រោយពេលការដឹកជញ្ជូនផ្លូវទឹកត្រូវបានកាត់ផ្តាច់ វាក្លាយជាច្រកដឹកជញ្ជូនគ្រឿងឧបភោគ-បរិភោគ គោលសម្រាប់នាំចូលមករដ្ឋធានីភ្នំពេញ។
– ១៩៧៥-១៩៧៩: ស្ទើរតែគ្មានការហោះហើរអន្តរជាតិ លើកលែងជើងហោះហើរមួយចំនួនឆ្ពោះទៅកាន់ប៉េកាំង និង ព្យុងយ៉ាង។
– ១៩៩៥: ជួសជុលកែលម្អដោយក្រុមហ៊ុន បារាំង- ម៉ាឡេស៊ី
Société Concessionnaire d’Aéroport (SCA)។
– ២០០៣: ប្តូរឈ្មោះទៅជា “អាកាសយានដ្ឋានអន្តរជាតិភ្នំពេញ”។
– ០៩ ខែ កញ្ញា ២០២៥: ផ្អាកដំណើរការជាអចិន្រ្តៃយ៍»៕
