មហាជនអ្នកគាំទ្រតាមដានពីអ្នកជំនួញអនឡាញល្បីឈ្មោះ អ្នកនាង ដួងច័ន្ទ ហៅយាយតយ កន្លងមកសុទ្ធសឹងតែបានឃើញ និង សរសើរចំពោះទឹកចិត្តនៃស្មារតីស្នេហាជាតិ និង វប្បធម៌របស់អ្នកជំនួញរូបនេះ ខណៈតែងឃើញអ្នកនាងបង្ហាញសកម្មភាពថតផ្សព្វផ្សាយពីវប្បធម៌ជាតិ ជាមួយឈុតបុរាណប្រពៃណីខ្មែរដ៏ប្រណីតៗ បង្ហាញទាំងក្នុង និង ក្រៅប្រទេសឱ្យពិភពលោកបានស្គាល់ពីកម្ពុជា។
ជាក់ស្ដែង ថ្មីៗនេះ មហាជនលើបណ្ដាញសង្គម ក៏កំពុងផ្ទុះចាប់អារម្មណ៍ចែករំលែក និង សរសើរខ្លាំង ក្រោយឃើញ យាយតយ បង្ហោះរូបភាពជាច្រើនសន្លឹក ដែលតុបតែងខ្លួនគ្រងឈុតប្រពៃណីបុរាណ ជាហូលស្បៃខ្មែរ រំលេចដោយគ្រឿងអលង្ការរចនាក្បាច់ខ្មែរដ៏ស្រស់ស្អាតប្រណីត ថតបង្ហាញលើទឹកដីអង្គរ ដើម្បីចូលរួមផ្សព្វផ្សាយពីសម្បត្តិវប្បធម៌ដ៏ល្អឯករបស់ខ្មែរ។
ក្នុងនោះ យាយតយ ក៏បានរៀបរាប់ភ្ជាប់ជាមួយរូបភាពថា ៖ «អ្នកល្អពេកហើយ ទើបគេចង់បានយ៉ាងនេះ គេប្រឹងឈ្លានពានយ៉ាងនេះ អ្នកមានសព្វបែបយ៉ាង ប្រាសាទ ទឹកដី ព្រៃភ្នំ ឈុតវប្បធម៌ដ៏ផូរផង់ ជាពិសេស គឺប្រជាជនចេះសាមគ្គីគ្នា ពិភពលោកគួរតែបានដឹងបានស្គាល់ថានេះគឺ Cambodia ចោរវាមិនអាចស្អាតដូចម្ចាស់ដើមទេ»។
ជាមួយគ្នានោះ ក្រៅពីមហាជនអ្នកគាំទ្រកម្ពុជា បានចែករំលែក និង បញ្ចេញមតិសរសើរពេញចិត្តខ្លាំងនូវការថតបង្ហាញពីវប្បធម៌ដ៏ល្អឯកក្នុងឈុតដ៏ប្រណីតរបស់ យាយតយ ក៏ឃើញមានហ្វេសប៊ុកជនជាតិថៃជាច្រើន បានចែករំលែកយកទៅបញ្ចេញមតិវែកញែកក្នុងន័យច្រណែនពីវប្បធម៌ដ៏ផូរផង់របស់កម្ពុជាផងដែរ៕
