គ្រួសារអុជធូបបួងសួង! បុរសម្នាក់បាត់ខ្លួន បន្ទាប់ពីលោតទៅជួយនារីម្នាក់ធ្លាក់ក្នុងប្រឡាយទឹកនៅស្ទឹងមានជ័យទី ៣ រកមិនទាន់ឃើញ

មហាជនអ្នកប្រើប្រាស់បណ្ដាញសង្គម បាននាំគ្នាផ្ទុះការភ្ញាក់ផ្អើល បន្ទាប់ពីបានជ្រាបករណីប្រុសស្រី ២ នាក់ ​បានធ្លាក់ចូលទៅក្នុងទឹកប្រឡាយ កាលពីវេលា​ម៉ោង​ ៣ និង ៤០ នាទីទៀបភ្លឺ ថ្ងៃទី​ ១១​ ខែតុលា​ ឆ្នាំ​២០២៥ ស្ថិតនៅចំណុចផ្លូវ៥០ម៉ែត្រ​ សង្កាត់ស្ទឹងមានជ័យទី៣ ខណ្ឌមានជ័យ រាជធានីភ្នំពេញ។

ទាក់ទិនទៅនឹងករណីនេះ តាមប្រភពព័ត៌មានបានបញ្ជាក់ឱ្យបានដឹងថា ខណៈគិតត្រឹមម៉ោង ១២ ថ្ងៃទី ១៣ ខែតុលា ឆ្នាំ ២០២៥ នេះ សពនារីម្នាក់ត្រូវបានរកឃើញ នៅយប់ថ្ងៃទី ១២ ខែតុលា ឆ្នាំ ២០២៥ ខណៈសពបុរសម្នាក់ទៀតដែលជាអ្នកលោតជួយតាមក្រោយ គឺមិនទាន់រកឃើញនៅឡើយ ធ្វើឱ្យម្ដាយ និង ក្រុមគ្រួសារមានប្រពន្ធកូនជាដើម បានយំសោក​ និង បានអុជធូបបួងសួងឱ្យឆាប់រកឃើញសាកសពនៅចំណុចកើតហេតុ។

គួរឱ្យដឹងផងដែរថា តាមរយៈវីដេអូឃ្លីបថតចេញពីកាមេរ៉ាសុវត្ថិភាព បានបង្ហាញថា នៅយប់កើតហេតុ អំឡុងពេលមេឃកំពុងធ្លាក់ភ្លៀង គេបានឃើញរថយន្ត Toyota Prius ពណ៌ទឹកប្រាក់ មិនចាំផ្លាកលេខ បានឈប់នៅបណ្តោយផ្លូវទ្រុងមាន់ ក្បែរស្តុបលូ ៣ បន្ទាប់មកគេបានឃើញបុរសម្នាក់ ពាក់អាវយឺតពណ៌ស ចេញពីរថយន្តទ្វារខាងស្តាំ ដើរសម្តៅទៅកាន់បង្គោលភ្លើង រួចក៏ក្អួតចង្អោរ។ ប៉ុន្មានវិនាទីក្រោយមក គេឃើញនារីម្នាក់ ស្លៀកពាក់រ៉ូបពណ៌ខ្មៅ បើកទ្វារខាងឆ្វេងចេញពីរថយន្ត ដើរទៅរកបុរសខាងលើដោយស្ទុះទៅឱប និង បង្កើតភាពស្និទ្ធស្នាល។

បន្ទាប់ពីស្និទ្ធស្នាលគ្នាក្នុងស្ថានភាពដូចស្រវឹងរួចមក អ្នកទាំង ២ បានបបួលគ្នាទៅឈរក្បែរមាត់ប្រឡាយ ដោយខាងស្រីឡើងឈរលើបង្កាន់ដៃបេតុងមាត់ប្រឡាយលូ ចំណែកខាងប្រុសនៅឈរលើផ្លូវក្បែរនោះ។ គ្រានោះគេបានឃើញខាងស្រីដើរបាន ៩ ទៅ ១០ ជំហាន ក៏បោះមួយជំហានទៀតធ្លាក់ចូលប្រឡាយលូតែម្តង ស្របពេលខាងប្រុសកំពុងឱបក្បាលច្រត់ដៃទៅរបាំងថ្ម មិនបានចាំភ្លឹក។ បន្ទាប់ពីដឹងថាខាងស្រីធ្លាក់ទឹក ខាងប្រុសក៏សម្រេចចិត្តលោតទៅជួយ តែក៏លិចបាត់ទៅទាំង ២ នាក់តែម្តង៕

ប្រភព ៖ Fresh News Daily & CNC