មកទល់ព្រឹកថ្ងៃទី ៣០ ខែកក្កដា ឆ្នាំ ២០២៥ ស្ថានភាពជម្លោះព្រំដែនរវាងកម្ពុជា និង ថៃ បានធូរស្រាយហើយ បន្ទាប់ពីភាគីទាំងសងខាងបានគោរពតាមបទឈប់បាញ់ ដែលបានចូលជាធរមាននៅម៉ោង ២៤:០០ នាទី ថ្ងៃទី ២៨ ខែកក្កដា ឆ្នាំ ២០២៥ កន្លងទៅ។
ខណៈស្ថានភាពតានតឹងរវាងប្រទេសទាំងពីរបានត្រលប់មកល្អប្រសើរជាងមុនបន្តិចនេះ នៅយប់ថ្ងៃទី ២៩ ខែកក្កដា ឆ្នាំ ២០២៥ សម្ដេចបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា បានសម្រេចផ្ដល់ក្របខណ្ឌរដ្ឋជូនដល់សាច់ញាតិទាហានដែលបានពលីក្នុងសមរភូមិមុខ ដែលបានបូជាជីវិតការពារជាតិក្នុងរយៈពេល ៥ ថ្ងៃដែលសៀមធ្វើការឈ្លានពានប្រទេសកម្ពុជា បណ្ដាលឱ្យកងទ័ពដ៏អង់អាចក្លាហានរបស់កម្ពុជាមួយចំនួនបានពលីជីវិត។
តាមប្រសាសន៍របស់សម្ដេចបវរធិបតី ហ៊ុន ម៉ាណែត បានប្រកាសនៅលើទំព័រហ្វេសប៊ុកផេកផ្លូវការថា ៖ «ការប្រយុទ្ធគ្នារវាងកងទ័ពកម្ពុជា និងកងទ័ពថៃក្នុងរយៈពេលប៉ុន្មានថ្ងៃនេះបានបណ្តាលឱ្យយោធិនមួយចំនួនត្រូវពលី របួស ពិការ ក៏ដូចជាប្រជាពលរដ្ឋរាប់ម៉ឺនគ្រួសារក្លាយជាជនភៀសសឹកមិនអាចប្រកបរបរចិញ្ចឹមជីវិតប្រចាំថ្ងៃបាន។
១. សម្រាប់យោធិន និងនគរបាលជាតិដែលកំពុងបំពេញប្រតិបត្តិការក្នុងសមរភូមិ គ្រួសារយោធិនពលី របួស ពិការ ៖
. រាជរដ្ឋាភិបាលបានរៀបចំ និងកំពុងអនុវត្តនូវកញ្ចប់គោលនយោបាយសម្រាប់គ្រួសារយោធិនពលី យោធិនរងរបួស ពិការ។
. ខ្ញុំបានចេញបទបញ្ជាឱ្យក្រសួងការពារជាតិ និងក្រសួងស្ថាប័នពាក់ព័ន្ធ សិក្សារៀបចំនូវគោលនយោបាយលើកទឹកចិត្តពិសេសសម្រាប់កងកម្លាំងប្រដាប់អាវុធទាំងយោធា ទាំងនគរបាលជាតិ ដែលបានចូលរួមដោយផ្ទាល់នៅក្នុងសមរភូមិការពារបូរណភាពទឹកដីនៅពេលនេះ។
. ចំពោះយោធិន និងកងនគរបាលជាតិដែលបានពលី ឬធ្លាក់ខ្លួនពីការមិនអាចបំពេញភារកិច្ចបន្តបាន រាជរដ្ឋាភិបាលនឹងផ្ដល់ក្របខ័ណ្ឌឱ្យសាច់ញាតិបង្កើតរបស់គាត់មួយរូបបានចូលបម្រើប្រទេសជាតិនៅអង្គភាពដែលគាត់បំពេញភារកិច្ចមុនពលី ឬធ្លាក់ខ្លួនពិការ»៕
