ថ្មីៗនេះ មានរឿងរ៉ាវរបស់បុរសជនជាតិចិនម្នាក់ ដែលត្រូវគ្រួសារដាក់សម្ពាធឱ្យរៀបការពេក តែរកក្រមុំៗមិនទាន់ ស្រាប់តែស្រវាបានស្រ្តីអាយុ ៥៤ ឆ្នាំមកធ្វើជាភរិយា។
តាមព័ត៌មានបានឱ្យដឹងថា បុរសរូបនេះមានវ័យ ២៧ ឆ្នាំ មានមុខរបរជាជាងជួសជុលឡាននៅក្នុងភូមិ។ ដោយសារតែអាយុកាន់តែទៅមុខ ហើយនៅមិនមានប្រពន្ធ បុរសនេះក៏ត្រូវឪពុកម្តាយដាក់សម្ពាធជារឿយៗឱ្យឆាប់រកប្រពន្ធនឹងគេ ព្រោះទៅមុខទៀតអាចនឹងកាន់តែពិបាក។ លុះត្រូវឪពុកម្តាយបង្ខំពេក បុរសរូបនេះក៏បានឱ្យមេអណ្តើកជួយរកកូនក្រមុំមួយរូបឱ្យ តែចៃដន្យអីមិនបានក្រមុំ បែរជាបានស្រ្តីមេម៉ាយដែលនៅតំបន់តែមួយ វ័យ ៥៤ ឆ្នាំ មានកូនប្រុសអាយុជាង ២០ ឆ្នាំទៅហើយ។
ស្រ្តីរូបនេះមិនមានទ្រព្យសម្បត្តិធនធានអ្វីឡើយ តែក៏មិនបានជំពាក់បំណុលគេ ហើយនាងយកថ្លៃទឹកដោះត្រឹមតែ ១២០ ០០០ យ័ន ឬស្មើប្រមាណជាង ១៦០ ០០ ដុល្លារឯណោះ ទើបខាងឪពុកម្តាយបុរសនោះពេញចិត្ត នឹងព្រមយកមកធ្វើជាកូនប្រសាតែម្តង។ ដោយឡែក ក្រោយពីរឿងនេះត្រូវបានគេចែកចាយទៅ មានមហាជនច្រើនណាស់ចូលបញ្ចេញមតិ ដោយអ្នកខ្លះថាមើលទៅមិនសម ព្រោះអ្នកទាំងពីរមានអាយុឃ្លាតគ្នាដល់ទៅជាង ២០ ឆ្នាំ ហើយខាងស្រីថែមទាំងមានកូនប្រុសពេញកំលោះរួចទៅទៀត៕
ប្រភព៖ Khaosod
