គ្រួសារខាងប្រុសចេះតែរករឿងដៀលត្មះលើរ៉ូបមង្គលការពេក កូនក្រមុំតូចចិត្តរហូតគិតខ្លី ក្រោយរៀបការបានប៉ុន្មានថ្ងៃ

មានរឿងរ៉ាវដ៏គួរឱ្យរំជួលចិត្តមួយនៅឯប្រទេសអាស៊ែបៃសង់ ដែលកូនក្រមុំវ័យក្មេងម្នាក់ សម្រចចិត្តបញ្ចប់ជីវិតខ្លួនឯង ក្រោយពីរៀបការហើយមិនបានប៉ុន្មានថ្ងៃ ដោយសារតែត្រូវគ្រូសារខាងកូនកំលោះដៀលត្មះរឿងរ៉ូបរៀបការ។

រឿងរ៉ាវមួយនេះ បានកើតឡើងនៅក្នុងទីក្រុង Mingachevir ដោយនារីជាកូនក្រមុំមានឈ្មោះ Laiyaman Mammadli វ័យ ១៩ ឆ្នាំ បានសម្លាប់ខ្លួន ក្រោយពីទើបតែរៀបការហើយបានត្រឹមប៉ុន្មានថ្ងៃ បន្សល់តែក្តីសោកស្តាយយ៉ាងខ្លាំងឱ្យឪពុកម្តាយ។ ក្នុងនោះ ឪពុករបស់នាងបានរៀបរាប់ឱ្យដឹងថា ក្រោយពីរៀបការហើយ គ្រួសារខាងប្រុសបានរករឿងឈ្លោះគ្នាជាមួយកូនស្រីរបស់ខ្លួន ដោយចោទថានាងស្លៀកពាក់រ៉ូបការសិចស៊ីពេក ទាំងដែលមើលទៅវាជារ៉ូបការធម្មតាទូទៅសោះ។ គ្រួសារខាងប្រុសនៅតែស្តីបន្ទោសកូនស្រីរបស់ខ្លួន រហូតដល់កើតសម្ពាធផ្លូវអារម្មណ៍ និងសម្រេចចិត្តបញ្ចប់ជីវិតខ្លួនឯងតែម្តង។

យ៉ាងណាមិញ កូនកំលោះ និងខាងក្រុមគ្រួសារបាននាំគ្នាមកចូលរួមបុណ្យសពរបស់នាងដែរ​ តែត្រូវឪពុកនាងដេញចេញទៅវិញ។ ដោយឡែក អាជ្ញាធរក្នុងប្រទេសអាស៊ែបៃសង់កំពុងតែពិចារណាថា តើគួររៀបចំពាក្យបណ្តឹងព្រហ្មទណ្ឌចំពោះករណីនេះឬទេ ព្រោះវាអាចចូលជាការរំលោភបំពានផ្លូវចិត្ត រហូតឈានដល់ការបាត់បង់ជីវិត៕

ប្រភព៖ The SUN