ថ្មីៗនេះ ក្រុមរបាំព្រះរាជទ្រព្យនៃកម្ពុជា បានមានឱកាសទៅសម្ដែងសិល្បៈនៅប្រទេសបារាំង។ ខណៈកំពុងបំពេញភារកិច្ចជូនជាតិ នាដការីម្នាក់នៃក្រុមរបាំមានទុក្ខជាទម្ងន់ ដោយទទួលដំណឹងថា អ្នកម្តាយរបស់ខ្លួនបានទទួលមរណភាពនៅឯមាតុភូមិ។
តាមការចែកចាយនៅលើបណ្តាញសង្គម នាដការីរបាំមានឈ្មោះថា ឈឹម ចាន់ស្រីណុច (ជីវី) ពេលទទួលបានដំណឹងភ្លាម នាងពិតជាពិបាកទទួលយកខ្លាំង ដោយបានត្រឹមស្រែកទ្រហោយំ និង មើលរូបភាពម្តាយតាមទូរស័ព្ទពីចម្ងាយ។
ជាមួយដំណឹងដ៏ក្រៀមក្រំនេះ មហាជនលើបណ្តាញសង្គម ក៏ដូចជាសិល្បករ បានចូលរួមចែករំលែកទុក្ខ តាមរយៈការ comment និង Share ជាហូរហែ។ ជាក់ស្តែង អ្នកគ្រូ វុធ ច័ន្ទម៉ូលី ជាគ្រូសិល្បៈរបាំបុរាណ ក៏បានបង្ហោះសារថា «អារម្មណ៍នេះពិតជាពិបាកទទួលខាំ្លងណាស់ សូមប្អូនរឹងមាំឡើង អ្នកគ្រូ និង មិត្តរួមអាជីពទាំងអស់ សូមលើកទឹកចិត្តប្អូនដ៏ពូកែរបស់អ្នកគ្រូ និង សូមឱ្យវិញ្ញាណក្ខន្ធម៉ាក់របស់ប្អូនបានទៅកាន់សុគតិភព។ ពួកយើងនៅជិតប្អូនរហូត រឹងមាំឡើង ស៊ូៗ!»៕
