គ្រូពេទ្យអាមេរិកម្នាក់ ត្រូវជាប់គុក ១០ ឆ្នាំ ក្រោយបោកអ្នកមកពិនិត្យសុខភាពថាមានជំងឺ ដើម្បីលក់ថ្នាំ និង ព្យាបាលយកលុយចំណេញ

ថ្មីៗនេះ នៅសហរដ្ឋអាមេរិក មានការកាត់ទោសទៅគ្រូពេទ្យម្នាក់ឱ្យជាប់គុករយៈពេល ១០ ឆ្នាំ ក្នុងករណីបោកបន្លំអ្នកមកពិនិត្យដែលមិនឈឺអីសោះថាមានជំងឺ ដើម្បីយកលុយចំណេញពីថ្លៃថ្នាំ និង ថ្លៃព្យាបាល។

តាមព័ត៌មានបានឱ្យដឹងថា គ្រូពេទ្យរូបនេះមានឈ្មោះ Jorge Zamora-Quezada វ័យ ៦៨ ឆ្នាំ ជាគ្រូពេទ្យឯកទេសសន្លាក់ និង ប្រព័ន្ធភាពស៊ាំ ហើយបើកគ្លីនិកមួយកន្លែងនៅក្នុងរដ្ឋ ​Texas។ Jorge ត្រូវគេរកឃើញថា បានធ្វើការបោកប្រាស់អ្នកដទៃក្នុងវិស័យវេជ្ជសាស្រ្តនេះជាង ២០ ឆ្នាំទៅហើយ ដោយតែងតែវិនិច្ឆ័យអ្នកដែលមកពិនិត្យនៅគ្លិនិករបស់ខ្លួនថាពួកគេមានជំងឺរ៉ាំរ៉ៃណាមួយ ហើយតម្រូវឱ្យពួកគេត្រូវព្យាបាល និង លេបថ្នាំ ទាំងដែលពួកគេគ្មានឈឺអ្វីសោះ រហូតបង្កឱ្យអ្នកទាំងនោះបានរងផលប៉ះពាល់ជាច្រើន ទាំងសុខភាពផ្លូវកាយ និង ផ្លូវចិត្ត។

Jorge រកចំណូលបានជាង ៥០ លានដុល្លារពីការចំណាយរបស់អ្នកជំងឺ និង ពីធានារ៉ាប់រ៉ង ព្រមទាំងបានយកលុយទាំងនោះទៅចាយវាយហ៊ឺហារ ទិញឡានទំនើប ទិញយន្តហោះឯកជន និង អចលនទ្រព្យធំៗ ១៣ កន្លែងទៀត។ Jorge ក៏បានព្យាយាមគំរាមធ្វើបាបបុគ្គលិករបស់ខ្លួនក្នុងរូបភាពផ្សេងៗ ដើម្បីឱ្យពួកគេធ្វើតាមល្បិចបោកប្រាស់របស់ខ្លួនទៀតផង។

យ៉ាងណាមិញ Jorge ត្រូវបានគេចាប់ផ្តើមដំណើរការក្តីកាលពីឆ្នាំ ២០២០ កន្លងទៅ ហើយបានកាត់ទោសនៅក្នុងឆ្នាំ ២០២៥ ឱ្យជាប់ពន្ធនាគារចំនួន ១០ ឆ្នាំ និង សងថ្លៃសំណងចំនួន ២៨ លានដុល្លារ ព្រមទាំងនឹងត្រូវគេតាមដានសកម្មភាព ៣ ឆ្នាំក្រោយចេញពីពន្ធនាគារផងដែរ៕

ប្រភព៖ Khaosod