គ្រូកីឡាថ្នាក់ទី ១២ ថៃម្នាក់ ត្រូវគេរកឃើញលួចជក់ថ្នាំញៀ.នជាង ២០ ឆ្នាំ ហើយក្នុងផ្ទះមានលាក់របស់ខុសច្បាប់

កាលពីដើមខែកក្កដា​ ឆ្នាំ ២០២៥ ថ្មីៗកន្លងទៅនេះ អាជ្ញាធររបស់ថៃបានចុះឃាត់ខ្លួនគ្រូបង្រៀនថ្នាក់ទី ១២ ម្នាក់ ក្នុងករណីលួចសេពគ្រឿងញៀនមករយៈពេលជាង ២០ ឆ្នាំ ព្រមទាំងមានលួចលាក់អាវុធខុសច្បាប់។

តាមសារព័ត៌មាន AMARINTV ខាងអាជ្ញាធរបានចុះទៅត្រួតពិនិត្យសាលារៀនមួយកន្លែង នៅក្នុងឃុំ Kut Hae ស្រុក Naklang ខេត្ត Nong Bua Lamphu ក្រោយពីមានការរាយការណ៍ថា មានគ្រូបង្រៀនម្នាក់បានលួចជក់គ្រឿងញៀន។ បន្ទាប់ពីការស៊ើបសួរ អាជ្ញាធរក៏ឃាត់ខ្លួនគ្រូបង្រៀនម្នាក់ ភេទប្រុស វ័យ ៤៤ ឆ្នាំ ដែលជាគ្រូបង្រៀនមុខវិជ្ជាកីឡា និង សិល្បៈដល់សិស្សថ្នាក់ទី ១២ ។ អាជ្ញាធរបានចុះទៅឆែកឆេរឃើញថាគ្រូរូបនេះមានគ្រឿងញៀនប្រភេទមេតំហ្វេតាមីនចំនួន ១២ គ្រាប់នៅនឹងខ្លួន ហើយនៅឯផ្ទះក៏មានកាំភ្លើងចំនួន ២ ដើមទៀត។

យ៉ាងណាមិញ គ្រូរូបនេះបានសារភាពថា ខ្លួនពិតជាបានសេពគ្រឿងញៀនពិតមែន ហើយសេពមកជាង ២០ ឆ្នាំទៅហើយ ក្នុងមួយថ្ងៃៗអស់ប្រមាណជា ៣ គ្រាប់ជាប្រចាំ ហើយក៏ព្រមទទួលកំហុសទៅតាមផ្លូវច្បាប់ និង ព្រមចូលខ្លួនទៅព្យាបាលបំបាត់សារធាតុញៀនផងដែរ៕

ប្រភព៖ AMARINTV