ប្រិយមិត្តដែលនិយមតាមដានជិវិតឯកជនរបស់អ្នកសិល្បៈច្បាស់ជាបានជ្រាបរួចមកហើយថា មុនពេលអ្នកនាង គង់ សុជាតិ រៀបការសាងគ្រួសារជាមួយពិធីករដ៏ល្បីល្បាញ លោក ជា វិបុល អ្នកនាងធ្លាប់មានស្វាមី និង ទទួលបានចំណងដៃកូនប្រុសម្នាក់ ស្រីម្នាក់។
មកដល់ពេលនេះ កូនប្រុសច្បងរបស់អ្នកនាង គង់ សុជាតិ បានរៀបការសាងគ្រួសាររួចរាល់ហើយ ចំណែកឯកូនស្រីរបស់អ្នកនាងឈ្មោះ Salpheal Nelly វិញ ប៉ុន្មានឆ្នាំចុងក្រោយនេះកាន់តែធ្វើឱ្យមហាជនអ្នកប្រើប្រាស់បណ្ដាញសង្គមពេញចិត្តខ្លាំងចំពោះទេពកោសល្យរបស់នាង ជាពិសេសគឺរូបរាងមុខមាត់ដ៏ស្រស់សោភារបស់នាង ជាមួយនឹងការតុបតែងខ្លួន មើលទៅស៊ីវិល័យទាន់សម័យដូចនារីបរទេស។
និយាយដល់កូនស្រីច្បងរបស់ពិធីការិនីជើងចាស់រូបនេះ គឺកញ្ញា Salpheal Nelly កាលពីថ្ងៃ ១៦ ខែកុម្ភៈកន្លងទៅ ទើបតែប្រារព្ធពិធីជប់លៀងខួបកំណើតគម្រប់ ២០ ឆ្នាំ។ ក្នុងនាមជាម្ដាយ អ្នកនាង គង់ សុជាតិ រំភើបខ្លាំង ពេលឃើញកូនស្រីដែលចិញ្ចឹមបីបាច់ឡើងមកដោយផ្ទាល់ដៃ អាចធំធាត់ឡើងប្រកបដោយការអប់រំ និង ភាពកក់ក្ដៅ ជាពិសេសគឺគោរពតាមគន្លងដំបូន្មានឪពុកម្ដាយ ធ្វើជាកូនដ៏ល្អនៅក្នុងគ្រួសារ។
ក្រឡេកទៅមើលទិដ្ឋភាពថ្ងៃកំណើតរបស់កញ្ញា Salpheal Nelly វិញ ដ្បិតថារៀបចំឡើងលក្ខណៈគ្រួសារពិតមែន ប៉ុន្ដែពោរពេញដោយភាពរីករាយ និង ក្ដីស្រឡាញ់យ៉ាងកក់ក្ដៅ។ ជាពិសេសលោក ជា វិបុល ដ្បិតថាលោកគឺជាឪពុកក្រោយមែន តែតាមរយៈសកម្មភាព ពាក្យសម្ដី និង ភាពស្និទ្ធស្នាលកន្លងមកបានបង្ហាញឱ្យច្បាស់ថា លោកស្រឡាញ់ និង ចាត់ទុកកញ្ញា Salpheal Nelly ដូចសាច់ឈាមបង្កើត៕
