មកដល់ពេលនេះ ចំពោះម្ចាស់ជ័យលាភីគ្រងមកុដថ្មី Miss Universe Cambodia 2025 អ្នកនាង ថៃ នារីសុជាតា ហៅ ហ្វីយ៉ាតា នៅតែត្រូវបានមហាជនអ្នកគាំទ្រវិស័យបវរកញ្ញាជាច្រើន ចែករំលែកបង្ហាញការអបអរសាទរដោយក្ដីពេញចិត្តខ្លាំង ព្រោះមើលឃើញពីភាពលេចធ្លោរបស់នាងទាំងសមត្ថភាព រូបសម្រស់ និង ចំណេះដឹងស័ក្តិសមបំផុតតំណាងឱ្យកម្ពុជាឈរលើឆាកអន្តរជាតិ MU ខាងមុខ។
យ៉ាងណាមិញ ក្រោយក្លាយជាម្ចាស់មកុដថ្មី MUC 2025 នេះដែរ ងាកមើលហ្វេសប៊ុករបស់បវរកញ្ញា ហ្វីយ៉ាតា ក៏បានឃើញនាងបង្ហោះសារជាបន្តបន្ទាប់ បង្ហាញពីអារម្មណ៍ពិតដោយក្ដីមោទកភាព និង រីករាយចំពោះលទ្ធផលរបស់ខ្លួន ព្រមទាំងបានបង្ហាញការអរគុណដល់បងប្អូនមហាជនសម្រាប់កម្លាំងចិត្ត និង ការគាំទ្រពេញចិត្តលើរូបនាង។
លើសពីនេះ ក្រោយគ្រងមកុដបាន ៣ ថ្ងៃ ក៏បានឃើញបវរកញ្ញា ហ្វីយ៉ាតា MUC 2025 បង្ហោះសារមួយទៀត បង្ហាញពីភាពស្មោះត្រង់របស់ខ្លួនក្នុងដំណើរលើវិស័យមួយនេះ ព្រមទាំងសន្យាថានឹងបន្តដំណើរដោយបេះដូង និង ជីវិតរបស់នាងទៀតផង។
សារនោះ អ្នកនាង ហ្វីយ៉ាតា បានបង្ហោះរៀបរាប់ថា ៖ «ខ្ញុំមិនអាចកែការគិតនរណាម្នាក់បានទេ តែខ្ញុំអាចកែការគិតខ្ញុំបាន.. ខ្ញុំដឹងថាខ្ញុំពិតស្មោះត្រង់.. ហើយខ្ញុំនឹងបន្តដំណើរនេះដោយបេះដូង និង ជីវិត»៕
