កាលពីថ្ងៃទី ៣១ ខែកក្កដា ឆ្នាំ ២០២៥ កន្លងទៅ លោក Natthaphon Nakphanit អនុរដ្ឋមន្រ្តីក្រសួងការពារជាតិរបស់ថៃ បានបោះសម្តីយ៉ាងមិននឹកស្មានមកលើប្រទេសកម្ពុជា ក្រោយពីមានអ្នកកាសែតបានសួរនាំទាក់ទងនឹងការចាប់ទាហានខ្មែរយកទៅ។
អនុរដ្ឋមន្រ្តីក្រសួងការពារជាតិរបស់ថៃរូបនេះ បានបោះសម្តីថា ខ្មែរមិនមែនជាសាច់ញាតិខ្ញុំទេ ស្លាប់ក៏ស្លាប់ចុះ កុំសង្ឃឹមថាខ្ញុំនឹងជួយ ទីនេះគឺជាប្រទេសថៃ មកទាមទារឱ្យដោះលែងអ្វីច្រើនម្ល៉េះ បើព្យាបាលមិនបានទេ ក៏វាឱ្យស្លាប់ត្រង់ហ្នឹងចុះ ព្រោះវាបានបាញ់កូនចៅខ្ញុំរបួស ស្លាប់ច្រើនណាស់ អ្នកខ្លះក៏បានទៅរកគ្រួសារវិញ អ្នកខ្លះទៀតក៏មិនបានទៅ ហើយមកមានមុខអីមកធ្វើលិខិតឱ្យសុំជួយសង្រ្គោះទៀត។
អនុរដ្ឋមន្រ្តីក្រសួងការពារជាតិរបស់ថៃសម្តីដែលគ្មានភាពមនុស្សធម៌នេះបានបន្តទៀតថា សម្រាប់ខ្ញុំ នរណាជួយក៏ជួយចុះ តែខ្ញុំមិនជួយដាច់ខាត ហើយការងារដែលនៅក្រោមការគ្រប់គ្រងរបស់ខ្ញុំ ខ្ញុំក៏មិនឱ្យជួយនរណាដូចគ្នា។
ដោយឡែក សម្តីទាំងនេះសរឱ្យឃើញថាថ្នាក់ដឹកថៃរូបនេះគឺគ្មានមនុស្សធម៌ ហើយមើលងាយអាយុជីវិតទាហានខ្មែរ ដែលថៃប្រើល្បីថោកទាបចាប់ទៅបន្ទាប់ពីបទឈប់បាញ់បានកើតឡើង។
គួរបញ្ជាក់ថា ទាហានខ្មែរដែលថៃប្រើល្បិចចាប់ទៅមានចំនួន ២១ រូប ហើយមកទល់ថ្ងៃទី ២ ខែសីហា ឆ្នាំ ២០២៥ នេះ ភាគីថៃទើបតែបានប្រគល់មកឱ្យកម្ពុជាវិញបានចំនួន ៣ នាក់ ដោយម្នាក់បានស្លាប់ ត្រូវបានបញ្ជូនមកកាលពីថ្ងៃទី ៣១ ខែកក្កដា ឆ្នាំ ២០២៥ កន្លងទៅ និង ចំនួន ២ នាក់ទៀត គឺបានបញ្ជូនមកវិញកាលពីថ្ងៃទី ១ ខែសីហា ឆ្នាំ ២០២៥ កន្លងទៅនេះ ទាំងសភាពមិនប្រក្រតី ដោយក្នុងនោះម្នាក់បានធ្លាក់ខ្លួនរបួសធ្ងន់ធ្ងរ និង ម្នាក់ទៀតបានភ្លេចភ្លាំងស្មារតី។ ចំពោះទាហានខ្មែរដែលនៅសល់គឺមានចំនួន ១៨ នាក់ ដែលកម្ពុជាកំពុងខ្នះខ្នែងឱ្យថៃបញ្ជូនមកកម្ពុជាវិញឱ្យបានឆាប់រហ័ស៕
