គំនិតចាស់ទុំ! ជូរី ល្អហួស ផុសសារក្ដៅគគុកមួយ ពាក់ព័ន្ធនឹងភាពសុក្រឹតរបស់គណៈកម្មការ បើយើងខ្លាំងគឺឈ្នះ តែបើចាញ់មិនគួរឡាំប៉ាទេ

បើទោះជាវ័យត្រឹម ១៧ ឆ្នាំ ក៏ពិតមែន ប៉ុន្តែ ជូរី ល្អហួស ត្រូវបានចាត់ទុកថា ជាសិល្បការិនីវ័យក្មេង ដែលទទួលបានជោគជ័យខ្លាំងមួយក្នុងវិស័យសិល្បៈ ទាំងផ្នែកចម្រៀង របាំបុរាណសម័យ និង សម្តែងទៀតផង។ លើសពីនោះ អ្វីដែល ជូរី ល្អហួស ធ្លាប់បានធ្វើឱ្យអ្នកគាំទ្រកម្ពុជាមានមោទកភាពសម្រាប់នាងក្នុងវិស័យបង្ហាញម៉ូដនោះ គឺ ម្ចាស់មកុដ Miss Preteen International 2024 វ័យក្មេងរូបនេះ ដណ្តើមបានមកុដ Miss Preteen International 2024 ជូនកម្ពុជាទៀតផង។

យ៉ាងណាមិញ នៅក្នុងឆ្នាំ ២០២៥ នេះ បើទោះជាមានភាពមមាញឹកយ៉ាងណា ជូរី ល្អហួស ក៏មិនបោះបង់ក្តីស្រមៃបន្តនោះឡើយ ដោយពេលនេះ ជូរី ល្អហួស កំពុងបន្តដំណើរក្នុងការប្រកួត Miss Teen Cambodia 2025 ដែលពាក់ស្លាក MTC28។ ក្នុងនោះ ដំណើរនៃការប្រកួតនេះ មហាជនអ្នកគាំទ្របវរកញ្ញាវ័យក្មេងរូបនេះ នៅតែបន្តជឿជាក់ថា ជូរី ល្អហួស នឹងទទួលបានតំណែងមកុដដូចមុន។

ដោយឡែក ក្រឡេកទៅមើលសាមីខ្លួនវិញ កាលពីពេលថ្មីៗនេះ ជូរី​ ល្អហួស បានបង្ហោះសារយ៉ាងមានអត្ថន័យ ទទួលបានការសរសើរយ៉ាងខ្លាំងពីមហាជន ដោយលើកឡើងថា ជូរី ល្អហួស នៅក្មេង ប៉ុន្តែមានការគិតបានល្អ ខណៈនាងបានបង្ហាញឆន្ទៈ និង ការត្រៀមខ្លួនរួចជាស្រេចក្នុងការប្រកួតប្រសិនបើនាងមិនទទួលបានជោគជ័យ។

បវរកញ្ញា ជូរី ល្អហួស បានរៀបរាប់ថា៖ «រាល់បេក្ខភាពចូលរួមប្រកួត សុទ្ធសឹងតែសម្លឹងមើលមកុដធំ ទាំងនាងខ្ញុំ ទាំងបេក្ខភាពផ្សេងៗទៀត។ នាងខ្ញុំមិនដែលមើលងាយគូប្រកួត ថាគេអន់ ឬខ្សោយជាងនាងខ្ញុំនោះទេ​ សំខាន់នាងខ្ញុំដុះខាត់សមត្ថភាពរបស់ខ្លួនឯងបន្ថែម ប៉ុន្តែបើសមត្ថភាពអ្នកផ្សេងខ្លាំងជាងខ្ញុំ និង ទទួលបានមកុដធំ ព្រោះសមត្ថភាពគាត់ខ្លាំង ម្ចាស់កម្មវិធី និង គណៈកម្មការសុក្រឹតណាស់! ពួកគាត់ជ្រើសរើសបេក្ខភាពណា ដែលមានសមត្ថភាពខ្លាំង ស័ក្តិសមនឹងគ្រងមកុដ ប៉ុន្តែបើសិនជាងនាងខ្ញុំ មិនទទួលបានជោគជ័យនៅក្នុងឆ្នាំនេះ ចាត់ទុកថាវាជាមេរៀន ដែលនាងខ្ញុំកំពុងតែអាន ប៉ុន្តែមិនទាន់ដល់ចំណុចបញ្ចប់។ ជាបទពិសោធមួយនៃជំហ៊ានជីវិត ដែលនាងខ្ញុំយកវាមកកែប្រែ ដើម្បីទទួលបានចំណុចល្អៗ ដើម្បីយកទៅអភិវឌ្ឍន៍ចំណុចខ្លាំងកែប្រែភាពខ្វះខាត ដែលនាងខ្ញុំបានជួបពីមុនយកទៅបំពេញ និង បង្ហាញនៅឆ្នាំណាមួយ ដែលគិតថាស័ក្តិសមជាមួយនឹងសមត្ថភាពរបស់នាងខ្ញុំ។ ជូរី ល្អហួស MTC28»៕