សារព័ត៌មាន Ettoday បានទម្លាយឱ្យដឹងពីករណីរបស់នារីម្នាក់នៅប្រទេសចិន ដែលត្រូវឪពុកម្តាយគេប្តឹងទារលុយរាប់ម៉ឺនដុល្លារ ក្រោយពីនាំកូនប្រុសគេអាយុ ៥ ឆ្នាំទៅចូលបន្ទប់ទឹកក្នុងហាងអាហារ ហើយចេញមកវិញ ចៃដន្យក្មេងរត់ទៅប៉ះឆ្នាំងស៊ុបរបួសពេញខ្លួន។
តាមព័ត៌មានបានឱ្យដឹងថា នារីរូបនេះធ្លាប់ជាអ្នកមើលក្មេងនេះពីមុនមក តែនាងឈប់មើលយូរហើយ ប៉ុន្តែនៅថ្ងៃកើតហេតុខាងឪពុកម្តាយបាននាំកូនមកផ្ញើនឹងនាងមួយថ្ងៃ ព្រោះតែមានការរវល់។ ដោយសារតែក្មេងប្រើបង្គន់បែបអង្គុយចោងហោងនៅក្នុងផ្ទះមិនបាន ទើបនាងនាំគេទៅចូលបន្ទប់ទឹកនៅក្នុងហាងអាហារមួយកន្លែងនៅក្បែរផ្ទះ។ ខណៈពេលចេញមកវិញ ស្រាប់តែក្មេងក៏រត់លេង ហើយជ្រុលទៅប៉ះឆ្នាំងស៊ុបក្នុងហាង បណ្តាលឱ្យកំពប់រលាកពេញខ្លួន មានរបួសយ៉ាងធ្ងន់ធ្ងរ។
យ៉ាងណាមិញ ខាងឪពុកម្តាយបានដាក់ពាក្យប្តឹងនាង ដោយអះអាងថានាងមិនបានមើលថែកូនរបស់ពួកគេឱ្យបានល្អ ទាំងដែលដឹងថានាំគេចូលទៅបន្ទប់ទឹកក្បែរចង្រ្កាន ដែលងាយបង្កឱ្យមានគ្រោះថ្នាក់។ ក្នុងនោះដែរ តុលាការក៏បានកាត់ក្តីឱ្យនាងជាប់ពន្ធនាគាររយៈពេល ៣ ខែក្រោមបទចោទប្រកាន់ថានាងមានការធ្វេសប្រហែស បណ្តាលឱ្យអ្នកផ្សេងទៀតរងរបួសធ្ងន់។ លើសពីនេះនាងត្រូវសងជំងឺចិត្តដល់ក្មេងប្រុសប្រមាណជា ៦ ម៉ឺនដុល្លារ និង សងទៅកាន់ឪពុកម្តាយរបស់គេក្នុងមួយនាក់ប្រមាណ ៦ ពាន់ដុល្លារផងដែរ៕
ប្រភព៖ Kapook
