គួរឱ្យគោរព! អ្នកឧកញ៉ារូបនេះ បង្កើតជំនួញធំៗក្នុងវិស័យវាយនភណ្ឌ ផ្តល់ការងារយ៉ាងច្រើនដល់ប្រជាពលរដ្ឋខ្មែរ ត្រូវបានទទួលស្គាល់ដោយរាជរដ្ឋាភិបាល

ជាអ្នកវិនិយោគល្បីឈ្មោះមួយរូបនៅកម្ពុជា បច្ចុប្បន្ន អ្នកឧកញ៉ា គង់ សាង ជាប្រធានសមាគមវាយនភណ្ឌ សម្លៀកបំពាក់ ស្បែកជើង និង ផលិតផលធ្វើដំណើរនៅកម្ពុជា (TAFTAC) ជាទីប្រឹក្សាសភាពាណិជ្ជកម្មកម្ពុជា (CCC) និង ជាអនុប្រធាននៃសមាគម WU Chinese Association in Cambodia (WAC) ផងដែរ។

អ្នកឧកញ៉ាកើតក្នុងឆ្នាំ ១៩៤៩ នៅសង្កាត់លេខ ៣ ក្រុងភ្នំពេញ ហើយលោកបានចូលប្រឡូកក្នុងវិស័យជំនួញតាំងពីដើមទសវត្សរ៍ឆ្នាំ ១៩៩០ មកម្ល៉េះ ដោយក្នុងចន្លោះឆ្នាំ១៩៩៣ ដល់ឆ្នាំ ១៩៩៦ បាននាំចូលនូវផលិតផលមួយចំនួនពីបរទេសមកលក់ក្នុងប្រទេស ជាពិសេស ក្រណាត់សម្រាប់ផ្គត់ផ្គង់ទីផ្សារក្នុងស្រុក។

នាចុងឆ្នាំ ១៩៩៦ លោក និង ដៃគូធុរជនចិនតៃវ៉ាន់បានបង្កើតរោងចក្រកាត់ដេរសម្លៀកបំពាក់ និង ក្រោយមកទៀតបង្កើតរោងចក្រប៉ាក់។ លោកក៏ជាស្ថាបនិកនៃរោងចក្រ Evergreen Apparel Cambodia Co., Ltd. ក៏ដូចជារោងចក្រ Evergreen Industrial Co., Ltd. និង រោងចក្រ Evergreen Computerized Embroidery Company ផងដែរ។ បន្ថែមលើនេះ លោកបានធ្វើការវិនិយោគលើវិស័យផ្សេងៗមួយចំនួនទៀត។

ក្នុងអាជីពជាអ្នកវិនិយោគ លោកត្រូវបានទទួលស្គាល់ពីសំណាក់រាជរដ្ឋាភិបាលក្នុងការចូលរួមចំណែកកសាងសេដ្ឋកិច្ចកម្ពុជា តាមរយៈការបង្កើតការងារជាច្រើនដល់ប្រជាពលរដ្ឋខ្មែរ ព្រមទាំងការងារមនុស្សធម៌ និង សង្គមជាច្រើនទៀត។

អ្នកឧកញ៉ា បានទទួលគ្រឿងឥស្សរិយយសជាច្រើនពីសំណាក់រាជរដ្ឋាភិបាលកម្ពុជា ជាពិសេសគ្រឿងឥស្សរិយយសថ្នាក់កំពូល «ជាតូបការ» ដែលប្រោសព្រះរាជទានដោយព្រះមហាក្សត្រ នៃព្រះរាជាណាចក្រកម្ពុជា។ អ្នកឧកញ៉ា គង់ សាង ក៏មានតួនាទីជាសមាជិកក្រុមប្រឹក្សាភិបាល នៃសមាគមឧកញ៉ាកម្ពុជាផងដែរ៕

ប្រភព៖ Cambodian Oknha Association