ជាព្រឹត្តិការណ៍ប្រវត្តិសាស្ត្រ ដែលក្លិបបាល់ទាត់នៅកម្ពុជា បានឡើងមកវគ្គផ្ដាច់ព្រ័ត្រ ត្រៀមដណ្ដើមពានរង្វាន់ធំលំដាប់ទី ៣ នៅអាស៊ី AFC Challenge League ដែលក្លិបព្រះខ័នរាជស្វាយរៀង កម្ពុជា នឹងត្រូវប៉ះជាមួយក្លិប FC Arkadag វគ្គផ្ដាច់ព្រ័ត្រ នៅវេលាម៉ោង ៧:០០ នាទីយប់ ថ្ងៃទី ១០ ខែឧសភា ឆ្នាំ ២០២៥ នេះ នៅឯពហុកីឡដ្ឋានជាតិមរតកតេជោ។
ក្នុងនោះសមាសភាពខ្សែបម្រើ ដែលតែងបញ្ជូនគ្រាប់បាល់ និង បង្កើតឱកាសឱ្យមិត្តរួមក្រុមក្នុងក្លិបព្រះខ័នរាជស្វាយរៀង កីឡាករ Nick Taylor ត្រូវបានអ្នកគាំទ្រ រំពឹងថានឹងមានវត្តមានប្រកួតក្នុងថ្ងៃនេះ ថ្វីដ្បិតលោកតែរៀបពិធីមង្គលកាលនៅថ្ងៃទី ០៩ ខែឧសភា ឆ្នាំ ២០២៥ ម្សិលមិញក្ដី។
ជាក់ស្ដែងនៅព្រឹកថ្ងៃទី ១០ ខែឧសភា ឆ្នាំ ២០២៥ នេះ កីឡាករ Nick Taylor បានបង្ហោះ Poster រូបលោកភ្ជាប់ជាមួយការប្រកួតវគ្គផ្ដាច់ព្រ័ត្រ AFC និងបានភ្ជាប់ពាក្យមួយឃ្លាថា «Time to write history»។ តាមរយៈការបង្ហោះនេះ ភរិយារបស់លោក គឺកញ្ញារ៉ាប៊ីបានស៊ែរបន្តថា «ថ្ងៃនេះទៅ Support ប្ដី» ខណៈលោករៀនថត ក៏បានបញ្ជាក់ឱ្យដឹងទៀតថា ៖ «ចង់ប្រាប់បងប្អូនថា ខ្ញុំទៅការគាត់យប់មិញ គាត់មិនបានប៉ះជាតិអាកុល សូម្បីមួយតំណក់ ហើយមិត្តភក្តិក៏ជូនពរ ហើយចង់ឱ្យគាត់បង្ហាញខ្លួនល្ងាចនេះផងដែរ។ ខ្ញុំប្រាប់គាត់ថា ស៊ុតឱ្យបាន ១ គ្រាប់យ៉ាងតិច»។
ក្នុងនោះ បើតាមការអះអាងរបស់លោក Pep Munos គ្រូបង្វឹកស្វាយរៀងក្នុងសន្និសីទព័ត៌មាន ថ្ងៃទី ០៩ ខែឧសភា បានឱ្យដឹងថា Nick Taylor នៅតែមានឈ្មោះក្នុងបញ្ជីក្រុមព្រះខ័នរាជស្វាយរៀង ក្នុងការប្រកួតដណ្តេីមជេីងឯក AFC Challenge League ទល់ FK Arkada៕
