ការបង្ហាញសកម្មភាពស្អប់នរណាម្នាក់ ឬ ក្រុមមនុស្សណាមួយ មិនថាក្នុងរូបភាពណា វាបង្ហាញពីការរើសអើង ដែលជះឥទ្ធិពលអវិជ្ជមានទាំងចំពោះសង្គម និង ខ្លួនឯងផ្ទាល់។ ជាពិសេស ការប្រកាន់ខ្ជាប់ទស្សនៈស្អប់ចំពោះ LGBTQ+ ឬ សហគមន៍អ្នកស្រលាញ់ភេទដូចគ្នា ដែលបច្ចុប្បន្ននៅកម្ពុជាយើងមានការបើកចំហ និង គាំទ្រកាន់តែខ្លាំង។ តាមតថភាពជាក់ស្តែង បុគ្គលដែលមានទស្សនៈស្អប់ ឬ រើសអើង LGBTQ+ ពួកគេនឹងប្រឈមបញ្ហា ៥ យ៉ាងទៅថ្ងៃមុខ។
១. ឯកាក្នុងសង្គម និង បាត់បង់ទំនាក់ទំនង
សព្វថ្ងៃបុគ្គល LGBTQ+ ត្រូវបានគេទទួលស្គាល់ និង គាំទ្រកាន់ច្រើនឡើង ដូចនេះសម្រាប់អ្នកមានទស្សនស្អប់ខ្ពើម ពួកគេនឹងមានទំនាក់ទំនងកាន់តែឆ្ងាយពី មិត្តភក្តិ ក្រុមគ្រួសារ និង ក្រុមការងារ ដែលគាំទ្រភាពស្មើគ្នា ឬ សមភាព។ កាលណាពួកគេនៅតែមានទស្សនៈនេះ ទៅថ្ងៃមុខមនុស្សជុំវិញខ្លួននឹងលែងចង់ចូលជិត ដែលនាំឱ្យកើតភាពឯកានៅក្នុងសង្គម ឬ អាចថាគ្រប់គ្នានឹងលែងរាប់រក។
២. ប្រឈមផលវិបាកនៅកន្លែងធ្វើការ
សព្វថ្ងៃស្ថាប័ន និង កន្លែងធ្វើការជាច្រើនបានផ្តល់អាទិភាពទៅលើភាពចម្រុះ ភាពស្មើគ្នា និង រួមបញ្ចូលគ្រប់ជាតិសាសន៍។ ការបង្ហាញការស្អប់តាមរយៈរូបភាពណាមួយ អាចជាលទ្ធផលនៃសកម្មភាពរើងអើង ដែលទៅថ្ងៃមុខ កន្លែងធ្វើការនឹងរើសអើងពួកគេវិញ អាចពិបាកក្នុងការចុះសម្រុងក្រុមការងារ ឬ កន្លែងការងារមិនទទួលយក ជាដើម។ បើនៅប្រទេសមួយចំនួន ការរើសអើងប្រឆាំងនឹងបុគ្គល LGBTQ+ គឺជាអំពើខុសច្បាប់ បើហ៊ានបញ្ចេញអាចនឹងប្រឈមទោសទៅតាមផ្លូវច្បាប់។
៣. កើតអារម្មណ៍តានតឹង ឬ រហូតដល់មានបញ្ហាផ្លូវចិត្ត
កាលណាកាន់ទស្សនស្អប់ ឬ រើសអើង យូរៗទៅអាចមានបញ្ហាផ្លូវចិត្ត។ ជាក់ស្តែង ភាពតានតឹង ស្ត្រេស ខឹង ស្អប់ និង ការគិតអវិជ្ជមាន អាចជាហានិភ័យចម្បងចំពោះខួរក្បាល។ ការសិក្សាជាច្រើនបានបង្ហាញថា មនុស្សដែលតែងតែស្អប់ មិនចេះអត់ឱន ទៅថ្ងៃក្រោយពួកគេនឹងប្រឈមកើតជំងឺថប់អារម្មណ៍ ជំងឺបាក់ទឹកចិត្ត ឬ បញ្ហាផ្លូវចិត្តធ្ងន់ធ្ងរផ្សេងៗពិបាកព្យាបាល។
៤. បាត់បង់ឱកាសរីកចម្រើន និង ភ្ជាប់បណ្តាញ
ដោយទស្សនមិនទទួលយក LGBTQ+ បុគ្គលនោះនឹងបាត់បង់ទំនាក់ទំនងដ៏មានន័យ មិត្តភាព និង បទពិសោធអស្ចារ្យថ្មីៗ ដែលធ្វើឱ្យពួកគេរីកចម្រើនទៅថ្ងៃមុខ។ ជាការពិត LGBTQ+ ជាប្រភេទបុគ្គលដែលពហុជំនាញ សមត្ថភាពចម្រុះ ពូកែទំនាក់ទំនង និង មានគំនិតច្នៃប្រតិដ្ឋខ្ពស់ ហើយកាលណារើសអើង នោះពួកគេនឹងបាត់បង់ការចែករំលែក បទពិសោធ និង ការភ្ជាប់បណ្តាញមួយផ្នែកធំនៅក្នុងសង្គម។
៥. មិនចុះចំណោម និង ដើរមិនទាន់គេ
អាកប្បកិរិយាសង្គមចំពោះសិទ្ធិ LGBTQ+ បានផ្លាស់ប្តូរយ៉ាងខ្លាំងនៅក្នុងប៉ុន្មានទសវត្សរ៍ចុងក្រោយ ដោយមានការបង្កើនការទទួលយក និង ការការពារផ្លូវច្បាប់សម្រាប់បុគ្គល LGBTQ+។ អ្នកដែលប្រកាន់ខ្ជាប់នូវទស្សនស្អប់ខ្ពើម អាចត្រូវបានគេមើលឃើញថាហួសសម័យ ឬ មិនចុះចំណោម ហើយពួកគេអាចប្រឈមនឹងការរិះគន់ ឬ ប្រតិកម្មពីមនុស្សជំនាន់ក្រោយ ដែលឱ្យតម្លៃលើសមភាព និង សិទ្ធិមនុស្ស៕
