ជារឿងសិរីមង្គលនៅក្នុងរាជវង្សានុវង្ស ក៏ដូចជាប្រជានុរាស្ត្រខ្មែរ ដែលពីរឆ្នាំចុងក្រោយនេះ ព្រះអង្គម្ចាស់ក្សត្រីយ៍សែរាជវង្សខ្មែរ ២ អង្គ បានរៀបមង្គលការ និង ធ្វើឡើងនៅក្នុងព្រះបរមរាជវាំងចតុមុខមង្គល ជាពិសេសក្រោមព្រះរាជាធិបតីភាពដ៏ខ្ពង់ខ្ពស់បំផុតនៃ ព្រះករុណា ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា និង សម្តេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរ ក្នុងសេរីភាព សេចក្តីថ្លៃថ្នូរ និង សុភមង្គល។
ព្រះអង្គម្ចាស់ក្សត្រិយ៍សែរាជវង្សខ្មែរ ២ អង្គ មានដូចជា៖
១. ព្រះអង្គម្ចាស់ក្សត្រិយ៍ នរោត្តម រស្មីពនិតា
ព្រះអង្គម្ចាស់ក្សត្រិយ៍ នរោត្តម រស្មីពនិតា បានរៀបមង្គលការជាមួយស្វាមីជាជនជាតិបរទេសឈ្មោះ ម៉ាស៊ីមីល្បាណូ បាតាល្បា កាលពីថ្ងៃទី ថ្ងៃទី ១៣ ខែកុម្ភៈ ឆ្នាំ ២០២៤។ ព្រះអង្គម្ចាស់ក្សត្រិយ៍ នរោត្តម រស្មីពនិតា គឺជាព្រះបុត្រីនៃ សម្តេចរាជបុត្រី ព្រះអនុជ នរោត្តម អរុណរស្មី ហើយត្រូវជាព្រះកនិដ្ឋា (ប្អូនស្រី) របស់អ្នកអង្គម្ចាស់នរោត្ដម រស្មីខែមុន្នី។ ព្រះអង្គម្ចាស់ក្សត្រិយ៍ ត្រូវជាព្រះរាជនត្តា (ចៅស្រី) ព្រះបរមរតនកោដ្ឋ ព្រះករុណា ព្រះបាទសម្តេច ព្រះនរោត្តមសីហនុ ជាទីគោរពសក្ការៈដ៏ខ្ពង់ខ្ពស់បំផុត និង ជាព្រះស្ថាបនិកនៃមូនិធិ មុទិតា។
២. ព្រះអង្គម្ចាស់ក្សត្រិយ៍ នរោត្តម ពង្ស់សូរិយា
ព្រះអង្គម្ចាស់ក្សត្រិយ៍ នរោត្តម ពង្ស់សូរិយា ទើបតែរៀបមង្គលការថ្មីថ្មោង ជាមួយស្វាមីគឺលោក អ៊ឹង ស៊ីវឈន់ កាលពីថ្ងៃទី ២៦ ខែវិច្ឆិកា ឆ្នាំ ២០២៥ នៅក្នុងព្រះបរមរាជវាំងចតុមុខមង្គល។ ទ្រង់បានភ្ជាប់ពាក្យកាលពីថ្ងៃទី ១ ខែ ឧសភា ឆ្នាំ ២០២៥ ក្រោយមានទំនាក់ទំនងនឹងលោក អ៊ឹង ស៊ីវឈន់ ប្រមាណ ៦ ឆ្នាំ។ ព្រះអង្គម្ចាស់ក្សត្រិយ៍ នរោត្តម ពង្ស់សូរិយា ជាព្រះបុត្រីរបស់ សម្តេចព្រះមហិស្សរា នរោត្តម ចក្រពង្ស ឧត្តមប្រឹក្សាផ្ទាល់របស់ព្រះមហាក្សត្រ ព្រះករុណាព្រះបាទសម្តេចព្រះបរមនាថ នរោត្តម សីហមុនី និង ជាសមាជិកក្រុមប្រឹក្សាធម្មនុញ្ញ និង ព្រះមាតាព្រះនាម មែន កែវមុនីរ៉ែន៕
