ជារឿងគួរឱ្យហួសចិត្ត នៅថ្ងៃទី ២៦ ខែមិថុនា ឆ្នាំ ២០២៥ នេះ ទូរទស្សន៍ជាតិខេត្តបន្ទាយមានជ័យ បានបង្ហាញពីបទសម្ភាសបងប្អូនជនជាតិខ្មែរ ដែលរៀបរាប់ឱ្យដឹងថា សមត្ថកិច្ចថៃ បានបំភ្លៃរឿងទាំងស្រុង បានទម្លាក់កំហុសមកលើអាជ្ញាធរខ្មែរ ថាមិនបើកច្រកទ្វារប៉ោយប៉ែតជូនបងប្អូនខ្មែរអាចឆ្លងកាត់មកស្រុកបាន ទាំងដែលសមត្ថកិច្ចថៃផ្ទាល់ ជាអ្នកបិទច្រកមិនឱ្យបងប្អូនខ្មែរចេញមកខ្លួនឯង។
អ្វីដែលកាន់តែហួសចិត្តទៀតនោះ ពួកគេភូតភរ ល្បិចកលគ្រប់បែបយ៉ាង ហើយឱ្យកាសែតរបស់ពួកគេឡាយផ្ទាល់ និង ចុះផ្សាយព្រោងព្រាតថាពលរដ្ឋខ្មែរដែលនៅកកកុញរវាងច្រកព្រំដែនខ្លងលឹក និង ប៉ោយប៉ែតនោះ គឺមកពីខាងកម្ពុជាមិនបើកច្រកជូន ដែលទាំងនេះគឺជាសារធាតុមិនមានសេចក្ដីថ្លៃថ្នូររបស់ទាហានថៃ និង សមត្ថកិច្ចថៃ ដែលប្រើយុទ្ធសាស្រ្តគ្រប់បែបយ៉ាង ដើម្បីតែទម្លាក់កំហុសមកលើខ្មែរយើង។
យ៉ាងណាមិញ អាជ្ញាធរកម្ពុជា ក្រោមការដឹកនាំបញ្ជាផ្ទាល់ដោយលោក អ៊ុំ រាត្រី អភិបាលខេត្ត លោកបានរង់ចាំទទួលបងប្អូនជានិច្ច និង ទទួលស្វាគមន៍គ្រប់ពេលវេលា ឱ្យតែថៃបើកច្រកទ្វារអនុញ្ញាតឱ្យពលរដ្ឋខ្មែរអាចត្រឡប់មកប្រទេសកំណើតវិញ តែទាហានថៃបែរជាមិនបើកឱ្យតាំងពីព្រឹក រហូតដល់ម៉ោងជាង ៧ យប់ ថ្ងៃទី២៥ ខែមិថុនា ឆ្នាំ ២០២៥ ទើបអនុញ្ញាតឱ្យបើកឆ្លងមកបាន៕
