នៅរាត្រីថ្ងៃទី ១២ ខែកញ្ញា ឆ្នាំ ២០២៥ នេះ កម្មវិធីប្រកួតសម្រស់ Miss Universe Cambodia បានឈានដល់វគ្គប្រកួតផ្ដាច់ព្រ័ត្រ និង ជាវេលារកឃើញម្ចាស់ជ័យលាភីគ្រងមកុដ Miss Universe Cambodia ប្រចាំឆ្នាំ ២០២៥ នេះហើយ ដើម្បីតំណាងកម្ពុជាទៅប្រកួតលើឆាកអន្តរជាតិ។
ក្នុងរាត្រីវគ្គផ្ដាច់ព្រ័ត្រនេះដែរ តាមរយៈការផ្សាយបន្តផ្ទាល់លើផេក Miss Universe Cambodia បានធ្វើឱ្យមហាជនអ្នកគាំទ្រតាមដានវិស័យបវរកញ្ញាជាច្រើនរំភើប និង បង្ហាញការអបអរសាទរចំពោះម្ចាស់ជ័យលាភីគ្រងមកុដថ្មី Miss Universe Cambodia 2025 គឺបានទៅលើបវរកញ្ញា ថៃ នារីសុជាតា។
ចំពោះតំណែងជាម្ចាស់ជ័យលាភីគ្រងមកុដថ្មី MUC 2025 នេះដែរ អ្នកនាង ថៃ នារីសុជាតា កំពុងត្រូវបានមហាជនអ្នកគាំទ្រវិស័យបវរកញ្ញាជាច្រើនចែករំលែកបង្ហាញការអបអរដោយក្ដីពេញចិត្តខ្លាំង ព្រោះមើលឃើញពីភាពលេចធ្លោរបស់នាងទាំងសមត្ថភាព រូបសម្រស់ និង ចំណេះដឹង ស័ក្តិសមបំផុតតំណាងឱ្យកម្ពុជាឈរលើឆាកអន្តរជាតិ MU 2025 ខាងមុខ។
ក្រៅពីអបអរដល់ម្ចាស់ជ័យលាភីគ្រងមកុដ ក្នុងនោះបេក្ខភាពបវរកញ្ញាជើងខ្លាំង ២ រូបទៀត ក៏ទទួលបានជ័យលាភីគាប់ចិត្តដែរ ដោយជ័យលាភីរងទី ១ MUC 2025 បានទៅលើបវរកញ្ញា សុគា គឹមលាង និង ជ័យលាភីរងទី ២ MUC 2025 បានទៅលើបវរកញ្ញា ពេជ្រ វត្តីសារ៉ាវឌ្ឍី៕
