លោកស្រី អ៊ឹមផាន វណ្ណឌី ត្រូវបានគេស្គាល់ថា ជាអគ្គនាយិកា និង ជាសហស្ថាបនិកនៃ ក្រុមហ៊ុនគ្រឿងអលង្ការ ជាង បាក់ វណ្ណ ហុង ឬ CBVH ដែលឯកទេសគ្រឿងអលង្ការពេជ្រលំដាប់ស្តង់ដាទី ១ នៅកម្ពុជា។ អាជីវកម្មធំធាត់ល្បីល្បាញដូចសព្វថ្ងៃ បានកើតឡើងពីការប្រឹងប្រែងរួមគ្នារវាងប្តីប្រពន្ធដ៏ពូកែ និង មានមហិច្ឆតាខ្ពស់ គឺ លោកស្រី អ៊ឹមផាន វណ្ណឌី និង ស្វាមីរបស់លោកស្រីគឺ លោក វណ្ណ ហុង តែម្តង។
បើនិយាយអំពីដំណើរដើមទង នៅក្នុងខែ វិច្ឆិកា ឆ្នាំ ១៩៩៨ លោកស្រី អ៊ឹមផាន វណ្ណឌី និង ស្វាមី បានបើកហាងគ្រឿងអលង្ការដំបូង ដែលមានឈ្មោះ ជាង បាក់ វណ្ណ ហុង មានទីតាំងនៅផ្លូវកម្ពុជាក្រោម រាជធានីភ្នំពេញ។ បើទោះការចាប់ផ្តើមមានអ្នកធ្វើការត្រឹមតែ ៥ នាក់ តែហាងរបស់លោកស្រីហាក់ទទួលបានប្រជាប្រិយភាពយ៉ាងរហ័ស នេះក៏ដោយសារតែអ្នកធ្វើគ្រឿងអលង្ការ គឺជាជាងដ៏ជំនាញដែលជាស្វាមីរបស់លោកស្រីផ្ទាល់ ខណៈដែលលោកស្រីក៏ផ្តើមធ្វើជាអ្នកគិតលុយ ជាអ្នកគ្រប់គ្រងហិរញ្ញវត្ថុហាង ហើយក៏រមែងទំនាក់ទំនងជិតស្និទ្ធជាមួយអតិថិជន។ គ្រានោះ ស្វាមីលោកស្រីជាប់ចិត្តយ៉ាងខ្លាំងចំពោះការឌីហ្សាញ និង ការងារជាងទង។ មែនទែនទៅ លោក វណ្ណ ហុង បានកើតនៅកម្ពុជា តែ លោកបានទៅរស់នៅប្រទេសវៀតណាមនៅអំឡុងរបបខ្មែរក្រហម ហើយក្រោយមកលោកបានត្រលប់មកកម្ពុជាវិញនៅក្នុងវ័យជំទង់។ ឪពុករបស់លោកមានឈ្មោះថា ជាង បាក់ ដែលជាជាងទងផងនោះ ក៏បានណែនាំឱ្យលោកបង្កើតឈ្មោះហាង ដែលគ្រប់គ្នាបានឃើញ និង ហៅមកដល់សព្វថ្ងៃ។
ក្រឡេកមក លោកស្រី អ៊ឹមផាន វណ្ណឌី វិញ លោកស្រីបានពង្រីកកេរ្តិ៍ឈ្មោះហាងជាលំដាប់ ដោយចូលរួមសិក្ខាសាលាផ្សេងៗនៅក្រៅប្រទេសដូចជានៅ សិង្ហបុរី ថៃ និង ម៉ាឡេស៊ីជាដើម។ ដំណើរនេះបានជួយឱ្យអាជីវកម្មរបស់លោកស្រីបង្កើតទំនាក់ទំនង និង ពង្រីកអាជីវកម្មកាន់តែធំ រួមបញ្ចូលទាំងហាងនៅខេត្តសៀមរាប និង ខេត្តបាត់ដំបង។
បច្ចុប្បន្ន ក្នុងនាមជាអគ្គនាយិកា និង ជាសហស្ថានិកនៃ ក្រុមហ៊ុនគ្រឿងអលង្ការ ជាង បាក់ វណ្ណ ហុង លោកស្រីដឹកនាំក្រុមហ៊ុនជាមួយការផ្តោតទៅលើការលក់ និង ការផលិត ព្រមនឹងប្រមើលម៉ាករបស់ខ្លួន ដូចទៅនឹងម៉ាកគ្រឿងអលង្ការល្បីៗលំដាប់ពិភពលោកដូចជា Bulgari, Tiffany and Co. and Cartier ជាដើម។
មិនខុសពីយើងគ្រប់គ្នា ជាស្ត្រីកាន់កាប់ជំនួញធំដុំ លោកស្រីរមែងជួបអារម្មណ៍ស្ត្រេស និង ខឹងក្រោធផងដែរ។ ដើម្បីគ្រប់គ្រងអារម្មណ៍នេះ លោកស្រីបានជ្រើសរើសវិធីសម្រួលអារម្មណ៍ដោយការធ្វើសមាធិ។ ការសមាធិបានក្លាយជាផ្នែកមួយដ៏មានសារសំខាន់សម្រាប់លោកស្រី វាជួយពង្រីកឥទ្ធពលវិជ្ជមានទៅលើជីវិតផ្ទាល់ខ្លួន និង អាជីវកម្មរបស់លោកស្រី។ ចាប់តាំងធ្វើសមាធិពីឆ្នាំ ២០១៨ លោកស្រីបានកាត់បន្ថយកំហឹង និង អារម្មណ៍តានតឹងបានយ៉ាងច្រើន៕
ប្រភព៖ Prestige
