ថ្មីៗនេះ មានករណីដ៏គួរឱ្យហួសចិត្តមួយ បានកើតឡើងនៅប្រទេសចិន ដោយមានបុរសពីរនាក់ជិះម៉ូតូមកជ្រួសគ្នានៅកណ្តាលផ្លូវ តែម្នាក់ៗបែរជាចិត្តសឿងមិនព្រមថយឱ្យគ្នាទៅមុន មានអីសុខចិត្តនៅឈប់លើម៉ូតូជាង ៤ ម៉ោងនៅកណ្តាលផ្លូវនោះតែម្តង។
តាមព័ត៌មានបានឱ្យដឹងថា រឿងរ៉ាវមួយនេះបានកើតឡើងលើដងផ្លូវក្នុងទីក្រុង Huizhou ខេត្ត Guangdong ប្រទេសចិន ដោយមានបុរសពីរនាក់ ម្នាក់ជាអ្នកដឹកជញ្ជូនម្ហូប និងម្នាក់ទៀតជាអ្នកដំណើរធម្មតា បានឆ្លងផ្លូវតាមចន្លោះតូចមួយនាដងផ្លូវក្នុងពេលស្របគ្នា បណ្តាលឱ្យមកជ្រួសមុខចំគ្នា ប៉ុន្តែម្នាក់ៗចិត្តខ្លាំងមិនព្រមថយសិននោះទេ គឺសុខចិត្តឈប់នៅលើម៉ូតូទាំងពីរនាក់ ចាប់ពីម៉ោង ៤ ល្ងាច រហូតដល់ម៉ោង ៨ យប់ឯណោះ។
យ៉ាងណាមិញ រឿងរ៉ាវនេះបានធ្វើឱ្យមហាជនមានការហួសចិត្តខ្លាំងណាស់ ព្រោះមិននឹកស្មានថាមានអ្នកចិត្តខ្លាំងដល់ថ្នាក់នេះឡើយ ហើយអ្នកខ្លះទៀតក៏នាំគ្នារិះគន់ថាការធ្វើបែបនេះអាចនឹងបណ្តាលឱ្យស្ទះចរាចរណ៍លើដងផ្លូវ។ ដោយឡែក បុរសទាំងពីរនេះ ត្រូវបានគេហៅទៅអប់រំណែនាំ និង កែតម្រូវអាកប្បកិរិយាតាមដងផ្លូវផងដែរ៕
ប្រភព៖ Khaosod
