ព័ត៌មាន Khaosod បានរាយការណ៍ឱ្យដឹងថា កាលពីថ្ងៃទី ១៨ ខែវិច្ឆិកា ឆ្នាំ ២០២៥ កន្លងទៅនេះ មានករណីទាហានល្បាតម្នាក់នៅខេត្តណារ៉ាធីវ៉ាត់ ត្រូវបានជនដៃដល់ចូលទៅបាញ់សម្លាប់ដល់កន្លែងស្នាក់នៅ។
តាមព័ត៌មានបានឱ្យដឹងថា ហេតុការណ៍បានកើតឡើងនៅស្រុកស្រីសាខន ខេត្តណារ៉ាធីវ៉ាត់ ដោយជនរងគ្រោះ មានវ័យ ៣៣ ឆ្នាំគឺជាទាហានល្បាតស្ម័គ្រចិត្តប្រចាំការនៅស្រុកស្រីសាខនផ្ទាល់។ ជនរងគ្រោះ ត្រូវបានជនដៃដល់ម្នាក់ លបចូលមកបាញ់ដល់កន្លែងស្នាក់នៅ ដោយរបួសចំខ្នងចំនួន ២ គ្រាប់ ហើយត្រូវបានគេបញ្ជូនទៅសង្រ្គោះដែរ តែជាអកុសលបានបាត់បង់ជីវិតទៅហើយ។
យ៉ាងណាមិញ ហេតុការណ៍នេះត្រូវបានគេឱ្យដឹងថាទាក់ទងនឹងក្រុមបះបោរដែលតែងតែបង្កចលាចលនៅខេត្តណារ៉ាធីវ៉ាត់កន្លងមក។ មកទល់ពេលនេះអាជ្ញាធរក្នុងតំបន់កំពុងតែស្រាវជ្រាវកំណត់មុខសញ្ញា និងតាមចាប់ខ្លួនដើម្បីមកដាក់ទោសទៅតាមផ្លូវច្បាប់៕
ប្រភព៖ Khaosod
