ខ្លាចអ្នកគាំទ្រថាបោកទៀត! ពេលនេះ លី អ៊ីវ៉ាធីណា និង សង្សារថ្មី រៀបចំពិធីបំពាក់ចិញ្ចៀនភ្ជាប់ពាក្យនឹងគ្នាហើយ

មហាជនអ្នកគាំទ្រដែលតាមដានពីជីវិតស្នេហារបស់តារាចម្រៀងស្រី លី អ៊ីវ៉ាធីណា បានជ្រាបហើយ ក្រោយពីចែកផ្លូវនឹងគូស្នេហ៍ចាស់យ៉ាងស្ងប់ស្ងាត់ មួយរយៈថ្មីនេះ នាងក៏បានបើកបង្ហាញមុខម្ចាស់បេះដូងថ្មីដែលជានារីដូចគ្នា និង បានសាងចំណងស្នេហាយ៉ាងផ្អែមល្ហែមបង្ហាញលើបណ្ដាញសង្គម។

យ៉ាងណាមិញ មកដល់ថ្មីៗកន្លងទៅនេះ អ្វីដែលធ្វើឱ្យមហាជនរំភើបអបអរជំនួសចំពោះជីវិតស្នេហារបស់កញ្ញា លី អ៊ីវ៉ាធីណា ខណៈបានឃើញនាងបង្ហាញសកម្មភាពរបស់គូស្នេហ៍ថ្មី បានរៀបចំ Surprise សុំនាងរៀបការយ៉ាងប្លែក ក្នុងអាងហែលទឹកនៅមុខមិត្តភក្តិរបស់អ្នកទាំងពីរ។

លើសពីនេះ បន្ទាប់ពីបង្ហាញសកម្មភាពសុំរៀបការ មកដល់ថ្ងៃទី ១៨ ខែកក្កដា ឆ្នាំ ២០២៥ នេះ លើហ្វេសប៊ុករបស់តារាស្រី លី អ៊ីវ៉ាធីណា ក៏បានបង្ហោះរូបភាពប៉ុន្មានសន្លឹកក្នុងឈុតប្រពៃណីខ្មែរ ដែលនាង និង គូស្នេហ៍ បានរៀបចំពិធីបំពាក់ចិញ្ចៀនភ្ជាប់ពាក្យនឹងគ្នាហើយ ដើម្បីបញ្ជាក់ឱ្យមហាជនបានឃើញថាជារឿងពិតទៀតផង។ ក្នុងនោះ កញ្ញា លី អ៊ីវ៉ាធីណា បានរៀបរាប់ថា ៖ « 17.7.2025..ជាថ្ងែពិសេសរបស់ចេចេ…ប៉ុណ្ណឹងច្បាស់នៅហ្វេនហ្វេន…កុំថាចេចេបោកទៀតណា»៕