ជាដំណឹងសម្រាប់បងប្អូនដែលមានសំបកកង់ឡានចាស់ៗ ពិសេសបងប្អូនដែលជាអាជីវករសំបកកង់ឡាន ក្នុងស្មារតីខ្មែរជួយខ្មែរ និង ក្នុងនាមជាអ្នកនៅសមរភូមិក្រោយ បងប្អូនអាចស្ម័គ្រចិត្តបរិច្ចាគសំបកកង់ឡានចាស់ៗជូនទៅកាន់កងទ័ពជួរមុខ សម្រាប់បម្រើការក្នុងតម្រូវការចាំបាច់ និង ជាប្រយោជន៍នានារបស់កងទ័ពជួរមុខរបស់យើង។
សម្រាប់មហាជនដែលមានបំណងចង់បរិច្ចាគ អាចដឹកយកទៅបរិច្ចាគបាននៅទីតាំងដីឡូត៍ពីរកន្លែងនេះ ដោយទីតាំងទី ១ នៅ ភូមិដើមប្រង់ ដែលស្ថិតនៅក្នុងភូមិតាពេជ្រ ឃុំឈ្វាំង ស្រុកពញាឮ ខេត្តកណ្ដាល ម្ដុំភ្នំរាប និង ភ្នំបាសិទ្ធ សូមចុចទីនេះដើម្បីមើលទីតាំងទី ១ ។ ទីតាំងទី ២ ឈ្មោះ ដីដើមមៀន ស្ថិតនៅភូមិកប់ស្រូវតូច សង្កាត់គោករកា ខណ្ឌព្រែកព្នៅ រាជធានីភ្នំពេញ សូមចុចទីនេះដើម្បីមើលទីតាំងទី ២ ។ លោកអ្នកក៏អាចទំនាក់ទំនងទៅកាន់លេខទូរសព្ទ ២ ខ្សែនេះ ៖ 012 222 774 និង 010 499 234 បានដែរ ដើម្បីទទួលព័ត៌មានពីការបរិច្ចាគ និង ទីតាំងដែលត្រូវយកទៅបរិច្ចាគ។
គួរឱ្យដឹងផងដែរថា កង់ឡាន គឺជាឧបករណ៍សំខាន់មួយក្នុងជួរកងទ័ព អាចប្រើការបានច្រើនយ៉ាង និង អាចធ្វើជាលេណដ្ឋានផងដែរ ដោយសារតែវាមានសណ្ឋានស្វិត នៅពេលដាក់ដីពីក្នុងមួយជាន់ទៀត វាកាន់តែមាំដែលធ្វើឱ្យគ្រាប់កាំភ្លើងល្មមៗ បាញ់មិនបែកទេ មាំជាងបាវខ្សាច់ទៀតផង៕
