មកដល់ថ្ងៃទី ១៧ ខែកញ្ញា ឆ្នាំ ២០២៥ នេះ តាមរយៈការចែករំលែកព័ត៌មានលើបណ្ដាញសង្គមមហាជនកម្ពុជា កំពុងបង្ហាញការបារម្ភខ្លាំងដល់កងទ័ពជួរមុខ និង ប្រជាជននៅតាមព្រំដែនខេត្តបន្ទាយមានជ័យ ក្រោយឃើញសកម្មភាពទាហានថៃបន្តបំពានលើអធិបតេយ្យភាពកម្ពុជា ដែលបានរាយបន្លាលួស ព្រមទាំងបង្កជារបួសដល់កងទ័ព និង ប្រជាជនខ្មែរ ដោយការបាញ់កាំភ្លើងជ័រ និង គ្រាប់បែកឧស្ម័នបង្ហូរទឹកភ្នែក។
ស្របពេលកម្ពុជាបន្តរងការឈ្លានពានពីថៃ ដែលឃើញកងទ័ពជួរមុខ និង បងប្អូនប្រជាជនខ្មែរតាមព្រំដែនខេត្តបន្ទាយមានជ័យ កំពុងតទាល់ជាមួយទាហានថៃ និង មានអ្នករបួសជាច្រើននាក់ ឃើញថាមហាជនកម្ពុជាទាំងមូល អ្នកសិល្បៈ ក៏ដូចជាអ្នកជំនួញល្បីៗក្នុងប្រទេស កំពុងបន្តចូលរួមជាជំនួយផ្សេងៗដល់កងទ័ពបន្តបន្ទាប់។
ក្នុងនោះដែរ ក៏បានឃើញហ្វេសប៊ុករបស់អ្នកជំនួញអនឡាញល្បីឈ្មោះ អ្នកនាង ឡុង ម៉ានីន បន្ទាប់ពីការចូលរួមជាជំនួយសប្បុរសធម៌យ៉ាងសកម្ម ដល់កងទ័ពជាច្រើនកន្លងមក ពេលនេះអ្នកនាង ក៏បានចំណាយថវិកាចំនួន ២ ម៉ឺនដុល្លារបន្ថែម សម្រាប់ទិញអាវក្រោះការពារជូនកងទ័ព និង ប្រជាជន ដែលកំពុងតទាល់ការឈ្លានពានរបស់ថៃនៅព្រំដែនផងដែរ។
ក្នុងនោះ អ្នកនាង ឡុង ម៉ានីន បានបង្ហោះលើហ្វេសប៊ុកថា ៖ «ខ្ញុំចំណាយថែម 20000 ដុល្លារទុកទិញអាវក្រោះជូនដល់កងទព័យើង និងប្រជាជនយើងដែលកំពុងតទាល់នឹងកងទ័ពសៀម»៕
