ពិតណាស់ ស្របពេលកម្ពុជារងការឈ្លានពានកាលពីមួយរយៈកន្លងទៅ ឃើញថាអ្នកក្នុងសិល្បៈជាច្រើន បានចូលរួមចំណែករួបរួមគ្នាជាកម្លាំងស្មារតីជួយប្រទេសជាតិតាមរយៈសកម្មភាពផ្សេងៗ ទាំងការប្រើសំឡេងតតាំងប្រឆាំងរកយុត្តិធម៌ និង សន្តិភាព ព្រមទាំងចូលរួមជួយជាថវិកា រៀបចំសម្ភារៈ ស្បៀងជូនកងទ័ពជួរមុខ និង បងប្អូនគ្រួសារភៀសសឹកជាច្រើន។
មកដល់ពេលនេះ ដ្បិតតែស្ថានភាពប្រទេសប្រសើរឡើងវិញបន្តិច ចំពោះសកម្មភាពសប្បុរធម៌របស់ អ្នកសិល្បៈ ក៏នៅឃើញបន្តសកម្មភាពរួបរួមគ្នា ត្រៀមសម្រាប់ផ្ដល់ជំនួយដល់កងទ័ពជួរមុខ ដែលកំពុងឈរជើងនៅក្នុងសមរភូមិផងដែរ។
យ៉ាងណាមិញ ក្រោយខ្នះខ្នែងជួយជាតិជាច្រើនថ្ងៃកន្លងមក ថ្មីៗនេះ ក្រឡេកទៅមើលអ្នកសិល្បៈជាច្រើនរូប ក៏បានងាកទៅបង្ហាញសកម្មភាពស្នេហាលើសម្បត្តិវប្បធម៌ខ្មែរម្ដង ដោយចូលរួមចំណែកជួយផ្សព្វផ្សាយ លើកស្ទួយវប្បធម៌ ដោយថតបង្ហាញពីសម្បត្តិបេតិកភ័ណ្ឌ និង វប្បធម៌ជាតិ លើទឹកដីអង្គរយ៉ាងស្រស់ស្អាតក្នុងឈុតសម្លៀកបំពាក់ប្រពៃណីបុរាណដ៏ប្រណីតៗបង្ហោះលើបណ្ដាញសង្គមរៀងៗខ្លួន៕
