បើគិតមកដល់ពេលនេះរយៈពេលប្រមាណជាង ៣០ ឆ្នាំមកហើយ ដែលតារាចម្រៀងរៀមច្បងលោក ចា ឬទ្ធី បានប្រឡូកក្នុងវិស័យសិល្បៈ និង រក្សាបានប្រជាប្រិយភាពមិនសាបសូន្យ។
ក្នុងនោះ បើទោះជាមិនលូកដៃចាប់អាជីពក្នុងសិល្បៈពេញទំហឹងដូចមុនក្តី ប៉ុន្តែ លោក ចា ឬទ្ធី នៅតែបានចូលរួមសម្តែង MV ម្តងម្កាល ដោយទស្សនិកជនធ្លាប់ឃើញហើយថា ភាគច្រើនលោកសម្តែងជាតួបងធំ និង អ្នកមានស្តុកស្តម្ភជាដើម។
ងាកមកកាន់វ័យឯណោះវិញ បច្ចុប្បន្នលោក ចា ឬទ្ធី មានវ័យច្រើនហើយក្តី ប៉ុន្តែរូបសម្រស់ និង កម្លាំងពលាំងរបស់តារារៀមច្បងរូបនេះ នៅតែស្រស់សង្ហា រឹងមាំមិនចាញ់ក្មេងៗស្រករក្រោយនោះឡើយ។ ម្យ៉ាងវិញទៀត បច្ចុប្បន្ន លោក ចា ឬទ្ធី ក៏ជាកីឡាករបាល់ទាត់ប្រចាំក្រុម Cambodia All Star មានវ័យច្រើនជាងគេ ប៉ុន្តែមើលទៅទាំងសម្រស់ និង សមត្ថភាពនៃការលេងបាល់មិនចាញ់សិស្សប្អូននោះឡើយ។
ដោយឡែក ថ្មីៗនេះ ក្នុងថ្ងៃមង្គលការរបស់កូនស្រីពៅរបស់លោក ចា ឬទ្ធី មហាជនកំពុងតែបានសរសើរពីមុខមាត់របស់លោក ថានៅតែក្មេងសង្ហា មិនចាញ់កូនប្រសាប្រុស និង កូនប្រុសបង្កើតនោះឡើយ។
គួរជម្រាបថា លោក ចា ឬទ្ធី មានកូនប្រុស ១ រូប និង កូនស្រី ១ រូប ដោយកូនប្រុសច្បងបានរៀបការ និង ទទួលបានចំណងដៃកូនប្រុសម្នាក់ ជាចៅរបស់លោក ចា ឬទ្ធី ហើយ។ រីឯកូនស្រីពៅរបស់លោក ទើបតែរៀបមង្គលការកាលពីថ្ងៃទី ១២ ខែមករា ឆ្នាំ ២០២៤ កន្លងទៅនេះ៕
រូបភាព៖ Pleang
