ពិតណាស់ ជុំវិញរឿងរ៉ាវដ៏ក្ដៅគគុក ដែលមហាជននៅលើបណ្តាញសង្គមហ្វេសប៊ុក បានចែករំលែក និង ប្រតិកម្មខ្លាំងលើពិធីករកីឡា Mc Vutha ដែលបាននិយាយប្រើពាក្យសម្ដីមិនសូវសមរម្យបែបបញ្ឆិតបញ្ឆៀងលេបខាយលើរូបរាងកាយចំពោះតារាស្រី និង Model កញ្ញា មុនីរស្មី បានមានការដោះស្រាយហើយដែរ។
ក្នុងនោះនៅព្រឹកថ្ងៃទី ៤ ខែមីនា ឆ្នាំ ២០២៥ កន្លងទៅនេះ MC Vutha ត្រូវបាន ក្រុមការងារនៃក្រសួងព័ត៌មាន និងក្រសួងកិច្ចការនារី ដឹកនាំដោយឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មាន បានសម្របសម្រួល និង ដឹកនាំកិច្ចប្រជុំពិនិត្យលើក្រមសីលធម៌វិជ្ជាជីវៈ និង ការប្រើប្រាស់ពាក្យសម្តីលេបខាយ បៀតបៀនលើស្ត្រីភេទ។
ម្យ៉ាងវិញទៀត ពិធីករឈ្មោះ ជួប វុត្ថា ហៅ MC Vutha បានបង្ហាញការសោកស្តាយ និង សូមអភ័យទោសជាសាធារណៈចំពោះប្អូនស្រី ឆឹង ច័ន្ទមុនីរស្មី និង ស្ត្រីគ្រប់រូប ព្រមទាំងសាធារណជនចំពោះកំហុសឆ្គងដោយខ្វះការពិចារណាទៅកាន់ស្ត្រី ដែលធ្វើឱ្យប៉ះពាល់កិត្តិយសស្ត្រី ដោយមានជាសរសេរលិខិតសុំទោសជាលាយល័ក្ខអក្សរ និង ជាវីដេអូសុំទោសជាសាធារណៈផងដែរ។
ដោយឡែក ក្រឡេកទៅមើលតារាសម្តែង និង តារាម៉ូដែល កញ្ញា មុន្នីរស្មី ឯណោះវិញ ក្រោយក្រសួងពាក់ព័ន្ធបានចូលរួមដោះស្រាយហើយនោះ នាងក៏បានចេញមកបង្ហោះសាររៀបរាប់យ៉ាងវែនអន្លាយ ដោយសង្កត់ធ្ងន់ថា៖ «…នាងខ្ញុំមិនដេញដោលបន្ត មិនមានអត្ថន័យថា រឿងនេះតូចមិនធំនោះទេ។ គ្រាន់តែចង់ស្ងប់ស្ងាត់ និង មិនចង់ឱ្យរឿងរ៉ាវនេះវែងឆ្ងាយដល់ជីវភាពគ្រួសារ ឬប្រភពចំណូលរបស់គាត់ឡេីយ។ អ្វីដែលនាងខ្ញុំចង់បាន គឺ នឹងមិនចង់ឃេីញមានរូបភាព ឬសកម្មភាពណាមួយ បៀតបៀនស្ត្រី និងកុមារី ជាពិសេស សិល្បការិនីណាមួយ កេីតឡេីងបន្តទៀតតាមរយៈ រូបភាពបែបនេះឡើយ។ សង្ឃឹមថាបងពិធីករ បានទទួលមេរៀនមួយនេះ នឹងកែប្រែកុំឱ្យមានរឿងនេះកើតឡើងម្តងទៀត…»។
លើសពីនោះ សារនោះដែរ កញ្ញា មុន្នីរស្មី ក៏បានអរគុណទៅដល់ក្រសួងពាក់ព័ន្ធ ថ្នាក់ដឹកនាំគ្រប់ជាន់ថ្នាក់ ព្រមទាំងបងប្អូនមហាជនបានចូលរួមប្រតិកម្មលើបញ្ហានេះ និង បង្កើតជាសំឡេងមួយជួយដល់រូបនាង និង ស្ត្រីដទៃទៀត ដែលទទួលរងការបៀតបៀនតាមរយៈរូបភាពផ្សេងៗទៀត៕
សូមអានសារលម្អិតខាងក្រោម៖
