មានរឿងរ៉ាវដ៏គួរឱ្យអាណិត និង ហួសចិត្តមួយនៅឯប្រទេសឥណ្ឌា ដោយមានបុរសម្នាក់បានដាច់ចិត្តលក់ក្រលៀនដើម្បីយកលុយទុកឱ្យកូនរៀន តែចុងក្រោយត្រូវប្រពន្ធលួចយកលុយនោះរត់ទៅនៅជាមួយនឹងប្រុសថ្មីបាត់។
តាមព័ត៌មានបានឱ្យដឹងថា ស្រ្តីជាប្រពន្ធបានលួងលោមឱ្យប្តីលក់ក្រលៀន ដោយអាងថាយកលុយមកទុកឱ្យកូនៗរៀន និង រៀបចំមង្គលការឱ្យពួកគេ។ ដំបូងឡើយបុរសជាប្តីស្ទាក់ស្ទើរ តែក៏ចុងក្រោយដាច់ចិត្តយល់ព្រម ព្រោះតែចង់បានប្រាក់មកផ្គត់ផ្គង់គ្រួសារ។
ក្រោយពីឆ្លងកាត់វះកាត់ដ៏ឈឺចាប់រួចរាល់ និង រកអ្នកទិញបាន បុរសជាប្តីក៏បានប្រគល់លុយចំនួន ១ លានរូពី ស្មើប្រមាណជាង ១ ម៉ឺនដុល្លារ ដែលបានមកពីការលក់ក្រលៀនរបស់ខ្លួនឱ្យទៅប្រពន្ធជាអ្នកទុកដាក់។ យ៉ាងណាមិញ អ្វីដែលមិននឹកស្មាន ស្រ្តីជាប្រពន្ធបានប្រមូលលុយទាំងអស់រត់ទៅស៊ីចាយជាមួយនឹងប្រុសថ្មី ដែលស្គាល់គ្នាតាមបណ្តាញសង្គម ទុកឱ្យប្តីនៅឈឺទាំងកាយ និង ឈឺទាំងចិត្តជាមួយកូនៗនៅផ្ទះ។ ចុងក្រោយនាងមិនដឹងកំហុសឡើយ គឺនាងសុខចិត្តរើសប្រុសថ្មី និង ពេញចិត្តលែងជាមួយប្តី ដែលខំលក់ក្រលៀនយកលុយឱ្យនាង៕
ប្រភព៖ Sanook
