មកដល់ដើមឆ្នាំខែមករា ម៉ាកហ្វេហ្សិនប្រណីតៗលើពិភពលោក បានកំពុងបញ្ចេញខូឡិកហ្សិនជាបណ្តើរៗនូវឈុត Haute Couture សម្រាប់រដូវកាល Spring/Summer 2025។ Haute Couture គឺជាហ្វេហ្សិនមួយដែលពិសេសបំផុត ខ្ពង់ខ្ពស់បំផុត ហើយក៏ជាភាពអស្ចារ្យនៃការបង្ហាញសម្លៀកបំពាក់ប្រណីតផ្តាច់មុខផងដែរ។ រដូវកាលបញ្ចេញខូឡិកហ្សិន Haute Couture រមែងធ្វើឡើងនៅទីក្រុងប៉ារីស ប្រទេសបារាំង និង ធ្វើឡើងពីរដងរៀងរាល់ឆ្នាំ ពោល Haute Couture spring/summer (សម្រាប់និទាឃរដូវ និង រដូវក្តៅ) ចាប់ផ្តើមនៅអំឡុងខែមករា និង Haute Couture fall/winter (សម្រាប់រដូវរងា) ចាប់ផ្តើមនៅអំឡុងខែកក្កដា។
ពាក្យ «Haute Couture» ត្រូវបានបកប្រែពីពាក្យរបស់ភាសាបារាំងមកជាភាសាអង់គ្លេសហៅថា «high dressmaking» ឬ «ការបង្កើតសម្លៀកបំពាក់លំដាប់ខ្ពស់»។ វាផ្តោតមូលដ្ឋានចម្បងលើការបង្កើតសម្លៀកបំពាក់ប្រណីតឱ្យសមនឹងខ្លួនឥតខ្ចោះ។ អត្ថន័យរបស់ Haute Couture សំដៅដល់គ្រប់ផ្នែកនៃរចនាសម្ព័ន្ធសម្លៀកបំពាក់ ត្រូវបានធ្វើឡើងដោយដៃ រាប់ចាប់តាំងពីចំណុចចាប់ផ្តើមរហូតដល់ចុងបញ្ចប់។ សម្លៀកបំពាក់ Haute Couture ធ្វើឡើងពីក្រណាត់គុណភាពខ្ពស់ និង ដេរភ្ជាប់យ៉ាងយកចិត្តទុកដាក់ដើម្បីលម្អិត និង បញ្ចប់ក្រោមថ្វីដៃអ្នកជំនាញមានបទពិសោធខ្ពស់។ អាចថាពេលយើងនិយាយដល់ Couture យើងនឹងភ្នកនឹកដល់ភាពខ្ពង់ខ្ពស់បំផុតនៃហ្វេហ្សិនលំដាប់ខ្ពស់ ឬ «the highest of high fashion»។
ពាក្យ «Haute Couture» ត្រូវបានកំណត់ជាផ្លូវការនៅក្នុងឆ្នាំ ១៩៤៥។ ពាក្យនេះត្រូវបានការពារដោយស្របច្បាប់ មានន័យថា វាអាចប្រើបានលុះត្រាតែមានការអនុញ្ញាតមុនសិនពីអង្គភាព Fédération de la Haute Couture et de la Mode ដែលជាអង្គការទទួលបន្ទុកលើកកម្ពស់ហ្វេហ្សិនបារាំងជាអន្តរជាតិ។ ហើយបិតាបង្កើត Haute Couture គឺ លោក Charles Frederick Worth ជាជនជាតិអង់គ្លេស កើតនៅឆ្នាំ ១៨២៥ និង មរណភាពនៅឆ្នាំ ១៨៩៥។ លោកជាបុគ្គលដំបូងបំផុត ដែលធ្វើឱ្យហ្វេហ្សិនមានរចនាសម្ព័ន្ធត្រឹមត្រូវ ទាំងការរៀបដំណើរការឌីហ្សាញ ការបញ្ចេញខូឡិកហ្សិន ក៏ដូចជាការដើរបង្ហាញម៉ូដ ដែលយើងឃើញដូចសព្វថ្ងៃ។ ប្រវត្តិរបស់លោកពិតជាអស្ចារ្យ និង គួរឱ្យចាប់អារម្មណ៍បំផុត។ ចង់ដឹងច្បាស់អំពីលោក កុំភ្លេចតាមដានជាមួយ «ប្រជាប្រិយ» នៅលើមាតិកាហ្វេហ្សិន ដែលយើងនឹងលម្អិតនៅក្នុងអត្ថបទបន្ទាប់នាពេលឆាប់ៗនេះ៕
