កាលពីថ្ងៃទី ១១ ខែកញ្ញា ឆ្នាំ ២០២៥ កន្លងទៅ មហាជនលើបណ្ដាញសង្គម ក៏ដូចជាអ្នកសិល្បៈ បានបង្ហាញការសោកស្ដាយ និង ចូលរួមរំលែកទុក្ខជាមួយតារាចម្រៀងស្រី បាន មុន្នីល័ក្ខ ក្រោយទទួលដំណឹងថានាងជួបទុក្ខធំបាត់បង់មនុស្សជាទីស្រឡាញ់ក្នុងគ្រួសារ គឺអ៊ំស្រីរបស់នាងបានទទួលមរណភាព។
ក្នុងនោះ កញ្ញា បាន មុន្នីល័ក្ខ បានបង្ហោះសារលើហ្វេសប៊ុកយ៉ាងក្រៀមក្រំថា ៖ «យូរៗបានជួបអ៊ំម្ដង ជួបម្ដងនេះ គឺលែងបានជួបអ៊ំជារៀងរហូត ក្មួយសូមឱ្យអ៊ំ ទៅកាន់ទីស្ងប់ផងចុះ..»។
ក្រោយបាត់បង់អ៊ំស្រីជាទីស្រឡញ់ធ្វើចិត្តមិនទាន់បានផង មកដល់ថ្ងៃទី ១២ ខែកញ្ញា ឆ្នាំ ២០២៥ នេះ កញ្ញា បាន មុន្នីល័ក្ខ ក៏បានបង្ហោះជូនដំណឹងដ៏ក្រៀមក្រំម្ដងទៀត ដែលនាងបានបាត់បង់មនុស្សជាទីស្រឡាញ់ក្នុងគ្រួសារម្នាក់ទៀត គឺក្មួយប្រុសរបស់នាងមានអាយុទើប ៥ ឆ្នាំបានទទួលមរណភាពដោយសារលង់ទឹក។
ក្នុងនោះ កញ្ញា បាន មុន្នីល័ក្ខ បានរៀបរាប់យ៉ាងរំជួលចិត្តថា ៖ «ផ្ទួនៗពេកហើយ មិនគួរអាយុខ្លីចឹងទេ ទើបតែបាន 5 ឆ្នាំ ទៅចោលម្ដាយ សូមក្មួយទៅឱ្យបានសុខណាក្មួយ»។ ក្រោយទទួលដំណឹងដ៏គួរឱ្យសោកស្ដាយនេះ មហាជនក៏ដូចជាអ្នកសិល្បៈ បានបង្ហាញការសោកស្ដាយជាពន់ពេក និង ចូលរួមរំលែកទុក្ខដ៏ក្រៀមក្រំជាមួយតារាស្រីរូបនេះ និង ក្រុមគ្រួសារផងដែរ៕
