ធ្មេចបើកៗ គិតមកដល់ពេលនេះមានរយៈពេល ៧ ឆ្នាំហើយនៃចំណងអាពាហ៍ពិពាហ៍របស់អតីតតារាសម្រៀង អ្នកនាង អែនជី និង ស្វាមី គឺលោក គង់ សុខអេង បើគិតចាប់តាំងពីថ្ងៃកាន់ដៃគ្នាចូលរោងការកាលពីថ្ងៃទី២៧ ខែ មេសា ឆ្នាំ ២០១៨ កន្លងមក។ ក្នុងនោះ អ្នកនាង អែនជី និង ស្វាមី ក៏ទទួលបានចំណងដៃកូនប្រុសស្រី ២ រូប ហើយដែរ។
ដោយឡែក កាលពីថ្ងៃទី ២៧ ខែមេសា ឆ្នាំ ២០២៥ កន្លងទៅ ពោលគឺនៅថ្ងៃខួបអាពាហ៍ពិពាហ៍រយៈពេល ៧ ឆ្នាំ របស់អតីតតារាចម្រៀងប្រចាំផលិតកម្មសាន់ដេខាងលើ និង ស្វាមី ក៏បានរៀបចំកម្មវិធីជប់លៀងយ៉ាងអធឹកអធម ជួបជុំក្រុមគ្រួសារ និង មិត្តភក្តិយ៉ាងមានសុភមង្គល។
ក្នុងកម្មវិធីខួបអាពាហ៍ពិពាហ៍នោះដែរ អ្វីដែលកាន់តែពោរពេញដោយស្នាមញញឹមនោះ អ្នកនាង អែនជី ត្រូវបានស្វាមីលុតជង្គង់បំពាក់ចិញ្ចៀនពេជ្រ ដូចសុំម៉ាក់ៗកូន ២ រូបនេះ រៀបការជាថ្មីយ៉ាងរ៉ូមែនទិក។ យ៉ាងណាមិញ ក្រឡេកទៅមើលមហាជនអ្នកគាំទ្រវិញ ក៏បានចូលរួមជូនពរ និង សរសើរដល់ជីវិតគូរបស់អ្នកនាង អែនជី ថាពិតជាផ្អែមល្ហែមមិនប្រែទៅណាសោះ៕