ធ្មេចបើកៗ រយៈពេលមួយឆ្នាំមកហើយ ដែល Influnecer ល្បីឈ្មោះ លោក ហេង វិសាល និង អ្នកនាង ជា ស្រីនា បានរៀបការក្លាយជាប្តីប្រពន្ធនឹងគ្នា រស់នៅពោរពេញដោយសុភមង្គលពេញទី បើគិតចាប់តាំងពីថ្ងៃទី ២៦ ខែមីនា ឆ្នាំ ២០២៤ កន្លងមក។
ក្នុងនោះ ក្រោយពីរៀបការរួចហើយ ស្វាមីភរិយាមួយគូនេះ ក៏កាន់តែទទួលបានការចាប់អារម្មណ៍ខ្លាំងពីជីវិតគូរបស់អ្នកទាំង ២ ដោយខាងប្រុស និង ខាងស្រី សុទ្ធសឹងតែជាបុគ្គលជោគជ័យ ប្រឹងប្រែងក្នុងកិច្ចការងារផង និង តែងតែបង្កើតសេចក្តីសុខក្នុងគ្រួសារថែមទៀតផង។
យ៉ាងណាមិញ នៅថ្ងៃទី ២៧ ខែមីនា ឆ្នាំ ២០២៥ កន្លងទៅ ពោលគឺជាថ្ងៃខួបអាពាហ៍ពិពាហ៍គម្រប់ ១ ឆ្នាំ លោក ហេង វិសាល បានបង្ហោះសារៀបរាប់ពីជីវិតគូរបស់លោក និង អ្នកនាង ជា ស្រីនា តាំងពីទើបបានស្គាល់គ្នា រហូតបានរៀបការជាមួយនឹងគ្នា ដោយបញ្ជាក់ច្បាស់ៗថា ភរិយាគឺអត្តចរិតមិនប្រួលប្រែឡើយ។
ក្នុងនោះ លោក ហេង វិសាល បានរៀបរាប់ថា៖ «មួយភ្លែតសោះ មួយឆ្នាំបាត់ហើយ ដែលខ្ញុំបានចំណាយជីវិតរបស់ខ្ញុំជាមួយនារីម្នាក់នេះ ពេលវេលាពិតជាដើរលឿនមែនទែន! ខ្ញុំនៅចាំបាន ពេលដែលខ្ញុំស្គាល់គាត់ដំបូង ខ្ញុំគិតក្នុងចិត្តថា កូននេះបែកៗ ត្រូវសប្បាយ ក៏សប្បាយ ត្រូវសេដ ធ្វើមុខសេដ ការគិតនៅពេលនោះខ្ញុំគិតថា ប្រហែលជាគាត់សម្តែង ដើម្បីចង់ឱ្យបរិយាកាសរីករាយហើយ ប៉ុន្តែមានឯណានៅជិតគាត់យូរទៅខ្ញុំក៏ឆ្លងតាមគាត់ដែរ ៤-៥ឆ្នាំ ដែលខ្ញុំនៅជិតគាត់ គាត់មិនបានប្តូរទេ គាត់នៅតែជាមនុស្សស្រីម្នាក់ដែលហ៊ានបង្ហាញអារម្មណ៍ និង ហ៊ានរស់ជាខ្លួនឯង ដោយមិនខ្លាចការគិតរបស់អ្នកណា ហើយអ្វីដែលធ្វើឱ្យខ្ញុំរឹតតែសរសើរក្មេងស្រីម្នាក់នេះទៀត គឺពីមុនខ្ញុំគិតថាគាត់មិនចេះ ខឹង អន់ចិត្តទេ ដោយសារតែមិនដែលឃើញគាត់បញ្ចេញ ដល់តែនៅជាមួយគាត់យូរទើបខ្ញុំដឹងថា តាមពិត គាត់ក៏ជាមនុស្សដូចយើងដែរ គាត់ចេះ ខឹង អន់ចិត្ត តូចចិត្ត ប៉ុន្តែគាត់មិនបញ្ចេញ ព្រោះគាត់មិនចង់ឱ្យនរណាម្នាក់ឈឺចាប់។ ពេលនោះទើបខ្ញុំដឹងថា គាត់គ្រាន់តែជាក្មេងស្រីម្នាក់ប៉ុណ្ណោះ មិនមែនជាទេវតាទេ ប៉ុន្តែចិត្តដែលគាត់តែងតែគិតពីគេគឺពិតជាអស្ចារ្យ។ ខ្ញុំពិតជាអរគុណនារីម្នាក់នេះ ដោយសារតែគាត់ខ្ញុំចាប់ផ្តើមចេះបង្ហាញអារម្មណ៍ ខ្ញុំហ៊ានរស់ និង បង្ហាញអ្វី ដែលជាខ្លួនឯងក្រៅពីធ្វើជាប្រុសរឹងមាំឡូយៗមិនមាត់ៗ។ ខ្ញុំអាចធ្វើជាខ្លួនឯង ដែលលេងច្រើនក៏បាន សប្បាយក៏អាចបញ្ចេញបានបាន ពិបាកចិត្តក៏អាចបញ្ចេញបាន។ Happy 1 year anniversary»៕
