ចាប់តាំងពីរៀបការសាងគ្រួសារមក វីរៈ និច្ច កាន់តែមានយីអ៊ុនឡើង ដោយអ្នកនាងបានក្លាយជាស្រ្តីអ្នកជំនួញយ៉ាងពេញទី មានមុខរបរស្អេកស្កះពេញដៃ និង បានបើកដំណើរការភោជនីយដ្ឋានធំៗបន្តបន្ទាប់។
មិនត្រឹមតែជោគជ័យលើមុខជំនួញតែម្យ៉ាងនោះទេ តារាចម្រៀងស្រីវ័យក្មេងរូបនេះ ក៏មានគ្រួសារមួយដ៏កក់ក្ដៅ មានស្វាមីស្រឡាញ់មើលថែ មានកូនប្រុសជាទាយាទស្នងត្រកូលដ៏គួរឱ្យស្រឡាញ់ ហើយកន្លងមកគេឃើញតារាស្រីរូបនេះ ធ្វើដំណើរកម្សាន្តទៅក្រៅប្រទេស ចាយជីវិតយ៉ាងអភិជនទាំងវ័យក្មេង។
លើសពីនេះ នៅថ្ងៃខួបអាពាហ៍ពិពាហ៍គម្រប់ ៤ ឆ្នាំ វីរៈ និច្ច ក៏បានប្រកាសដំណឹងដ៏រីករាយថ្មីមួយទៀតសម្រាប់គ្រួសារនាង គឺនាងកំពុងពពោះកូនស្រីម្នាក់ទៀតនៅក្នុងផ្ទៃ ដែលនេះជាកាដូខួបរៀបការ ៤ ឆ្នាំដ៏ធំមួយ ព្រោះអ្នកនាង និង ស្វាមីមានកូនប្រុសច្បងម្នាក់ហើយ និង ចង់បានកូនស្រីម្នាក់ទៀត ហើយពេលនេះពួកគេក៏បានសម្រេចដូចបំណង។
ដ្បិតថាចាប់តាំងពីសាងគ្រួសារមក វីរៈ និច្ច ហាក់រយាលដៃពីសិល្បៈចម្រៀង ដោយងាកទៅមើលថែក្រុមគ្រួសារ និង ជំនួញវិញក៏ពិតមែន ប៉ុន្ដែនាងមិនបានឃ្លាតពីអាជីពមួយនេះទាំងស្រុងនោះទេ ចំណែកឯកម្មវិធីនានារបស់អ្នកសិល្បៈ ក៏គេឃើញនាងតែងបង្ហាញវត្តមានជារឿយៗផងដែរ៕
