ខួបកំណើតអាយុ ៣៨ ឆ្នាំ ឱក សុគន្ធកញ្ញា មិនប្រ ថ្នាអ្វីទៀតទេ ព្រោះមានជីវិតពេញលេញគ្រប់សព្វ ទាំងគ្រួសារកក់ក្ដៅ និង ភាពល្បីល្បាញ

ជាការពិតណាស់ អ្នកគាំទ្រកំពូលតារាចម្រៀង ឱក សុគន្ធកញ្ញា ច្បាស់ជាបានជ្រាបហើយពីថ្ងៃពិសេសរបស់អ្នកនាង កាលពីថ្ងៃទី ១៤ ខែកញ្ញា ឆ្នាំ ២០២៥ ដែលជាថ្ងៃខួបកំណើតគម្រប់អាយុ ៣៨ ឆ្នាំ របស់អ្នកនាង។ ក្នុងនោះដែរ តាំងពីមុនថ្ងៃខួបកំណើតរហូតមកដល់ពេលនេះ គេបានឃើញអ្នកគាំទ្រ និង មិត្តភក្តិទាំងក្នុងក្រៅសិល្បៈជាច្រើន នៅតែបន្តជូនពរខួបកំណើតដល់ម៉ាក់ៗកូន ២ នេះ ហូរហែ។

ងាកទៅកាន់ អ្នកនាង ឱក សុគន្ធកញ្ញា ឯណាវិញ គឺមិនខុសពីឆ្នាំមុនៗឡើយ ពោលគឺអ្នកនាង ទទួលបានការជូនពរដ៏កក់ក្តៅ និង មានន័យរៀងរាល់ឆ្នាំក្នុងថ្ងៃកំណើតជានិច្ច។ ជាក់ស្តែង នៅឆ្នាំនេះក៏ដូចគ្នា អ្នកនាង ឱក សុគន្ធកញ្ញា ក៏បានបង្ហាញអារម្មណ៍រំភើបចិត្ត និង ពោលពាក្យយ៉ាងមានន័យសម្រាប់អ្នករាល់គ្នាវិញដែរ។

ក្នុងនោះ ម៉ាក់ៗអូន ឆលី និង Preshley រូបនេះបានរៀបរាប់ថា៖ «ឆ្នាំនេះកើនតែអាយុ ប៉ុន្តែសុំរក្សាភាពក្មេងវ័យដដែល! សូមអរគុណដល់អ្នកគាំទ្រទាំងអស់ សម្រាប់ពាក្យជូនពរ ការយកចិត្តទុកដាក់ និង ក្តីស្រឡាញ់ក្នុងថ្ងៃកំណើតរបស់នាងខ្ញុំ។ ការគាំទ្រដ៏មានតម្លៃពី បងប្អូន មិត្តភក្តិ និង មនុស្សទីស្រឡាញ់គឺជាកម្លាំង និង ជាការលើកទឹកចិត្តដ៏មានតម្លៃសម្រាប់នាងខ្ញុំ»៕