ទើបតែខួបកំណើតកូនប្រុសច្បងកាលពីខែមុន ឥលូវដើមខែថ្មី ចូលដល់ខួបកំណើតកូនស្រី គិត ស៊ូណាវីន ទេវី វិញម្តង។ ជាការអបអរថ្ងៃខួបកំណើតទៅកាន់កូនស្រីសំណព្វ អ្នកឧកញ៉ា គិត ម៉េង បានបង្ហោះសាររៀបរាប់ក្នុងនាមជាឪពុក ដែលតែងតែផ្តល់ក្តីស្រលាញ់ និង មោទកភាពចំពោះភាពរីកចម្រើនរបស់កូន។
ជាក់ស្តែង អ្នកឧកញ៉ា គិត ម៉េង បានសរសេររៀបរាប់នៅលើបណ្តាញសង្គមថា៖ «រីករាយថ្ងៃខួបកំណើតគម្រប់ ១៧ ឆ្នាំកូនស្រីសំណព្វរបស់យើង គិត ស៊ូណាវីន ទេវី!
ពិតជាមិនគួរឱ្យជឿតែមួយប៉ប្រិចភ្នែកសោះកូនមានអាយុ ១៧ ឆ្នាំហើយ។ វាហាក់បីដូចជាម្សិលមិញ ដែលកូនកំពុងសើចសប្បាយជាមួយរឿងកំប្លែងរបស់ប៉ា លួចញ៉ាំអាហាររបស់ប៉ានៅពេលប៉ាមិនបានមើល ហើយកូននំាមកនូវភាពរំភើបរីករាយក្នុងការរស់នៅប្រចាំថ្ងៃរបស់យើង។ ឥឡូវ នៅពេលប៉ាមើលទៅកាន់កូន ប៉ាពិតជាស្ងើចកូន។ កូនមានភាពឆ្លាតវៃ ចិត្តល្អ កំប្លែង និងមានបុគ្គលិកលក្ខណៈពោរពេញដោយភាពវិជ្ជមាន ដែលធ្វើឱ្យប៉ាមានសុភមង្គល ទោះបីក្នុងពេលវេលាលំបាកក៏ដោយ។
ប៉ាដឹងថាប៉ាមិនពូកែខាងវោហារទាំងនេះទេ ប៉ុន្តែទោះយ៉ាងណាជីវិតប៉ាពិតជាមានអត្ថន័យណាស់ដែលមានរូបកូន។ រាល់ពេលដែលប៉ាឃើញកូនញញឹម ឮកូនសើច ឬមើលកូនធ្វើអ្វីមួយប្រកបដោយភាពក្លាហាន និង ចិត្តសប្បុរស ប៉ាមានក្តីសុខពេញបេះដូង។ កូនមិនត្រឹមតែធំលូតលាស់នោះទេ ប៉ុន្តែកូនក៏កំពុងវិវឌ្ឍខ្លួនទៅជាមនុស្សមានលក្ខណៈពិសេស ដែលធ្វើឱ្យប៉ាមានមោទកភាពជារៀងរាល់ថ្ងៃ។
មិនថាកូនមានអាយុប៉ុន្មាននោះទេ កូននៅតែជាកូនស្រីតូចរបស់ប៉ាជានិច្ច ជាមនុស្សដែលបានបង្រៀនប៉ាឱ្យយល់ពីអត្ថន័យនៃក្តីស្រឡាញ់ដ៏ជ្រាលជ្រៅ ឱ្យប៉ាកាន់តែមានសេចក្តីសុខ និង ឱ្យប៉ាបង្កើតភាពរីករាយតាមរយៈសកម្មភាពតូចៗ។ មិនថាជីវិតកូននៅទីណានោះទេ ប៉ានឹងនៅទីនោះជាមួយកូនជានិច្ច ដើម្បីត្រៀមខ្លួនផ្តល់ការគាំទ្រដល់កូន ផ្តល់សំណើចរីករាយដល់កូន និង រម្លឹកកូនពីកុមារភាពរបស់កូន ទោះបីកូនវិវឌ្ឍខ្លួនបែបណាក៏ដោយ។
ដូច្នេះ ថ្ងៃនេះដែលជាថ្ងៃខួបកំណើតអាយុ ១៧ ឆ្នាំរបស់កូន ប៉ាសង្ឃឹមថាកូនទទួលបានក្តីស្រលាញ់ដ៏ជ្រាលជ្រៅពីប៉ាចំពោះកូន។ សូមឱ្យឆ្នាំនេះនាំមកនូវសុភមង្គលជានិច្ចនិរន្តរ៍ដល់កូន ហើយសូមឱ្យកូនសម្រេចនូវក្តីសុបិនធំ និងពោរពេញដោយស្នាមញញឹម។
រីករាយថ្ងៃខួបកំណើត កូនស្រីបណ្តូលចិត្តរបស់ប៉ា! ប៉ាស្រទ្បាញ់កូនលើសពីពាក្យពេចន៍ដែលប៉ាបានរាយរាប់នេះទៅទៀត៕
