នៅថ្ងៃទី ៣០ ខែឧសភា ឆ្នាំ ២០២៥ នេះ តាមរយៈ GRK News បានចេញសេចក្តីប្រកាសព័ត៌មានឱ្យបានដឹងថា នៅព្រឹកថ្ងៃទី ៣០ ខែឧសភា ឆ្នាំ ២០២៥ នេះ កងរាជអាវុធហត្ថ បានឃើញការផ្សព្វផ្សាយតាមបណ្ដាញព័ត៌មានសង្គម ពាក់ព័ន្ធនឹងបុគ្គលម្នាក់ស្លៀកពាក់ឯកសណ្ឋានជំនាញកងរាជអាវុធហត្ថ ខណៈបើតាមការពិនិត្យភិនភាគ និង អត្តសញ្ញាណ បុគ្គលនោះមិនមានឈ្មោះក្នុងការគ្រប់គ្រងរបស់កងរាជអាវុធហត្ថទេ។
ក្រោយបានឃើញការបង្ហោះបែបនេះភ្លាម កងរាជអាវុធហត្ថ បានបើកការស៊ើបអង្កេត និង ស្រាវជ្រាវ លុះដល់ម៉ោង ១៣ និង ២០ នាទី ថ្ងៃខែដដែល ទើបធ្វើការឃាត់ខ្លួនបុគ្គលនេះបានសម្រេច។ បច្ចុប្បន្នបុគ្គលសង្ស័យ ត្រូវបានឃាត់ខ្លួនបណ្ដោះអាសន្ននៅបញ្ជាការដ្ឋានកងរាជអាវុធហត្ថខេត្តព្រះសីហនុ និង កំពុងបន្តអនុវត្តតាមនីតិវិធី។
សូមបញ្ជាក់ថា មុននឹងឈានដល់ការឃាត់ខ្លួន នៅថ្ងៃទី ៣០ ខែឧសភា ឆ្នាំ ២០២៥ នេះ មានគណនីស្ត្រីម្នាក់បានបង្ហោះសាររៀបរាប់រឿងរ៉ាវបែកចែកផ្លូវគ្នាជាមួយអតីតសង្សាររបស់ខ្លួន ដោយភ្ជាប់ជាមួយរូបភាពថតជាមួយគ្នា ដែលខាងប្រុសពាក់ឯកសណ្ឋានជំនាញកងរាជអាវុធហត្ថ ទាំងដែលខ្លួនមិនមានឈ្មោះក្នុងការគ្រប់គ្រងរបស់កងរាជអាវុធហត្ថនោះឡើយ។
តាមរយៈសារនោះស្ត្រីជាសង្សារបានរៀបរាប់ថា ៖«ខ្ញុំ និង គាត់ បានបែកគ្នារយៈពេលជិត ១ ខែហើយ ប៉ុន្តែគាត់មិនព្រមដោះលែងខ្ញុំ តាមរករឿងខ្ញុំរហូត តាំងពីខ្ញុំស្រលាញ់ជាមួយគាត់រយៈពេល ១ ឆ្នាំកន្លងមកនេះ គាត់តែងតែធ្វើបាបខ្ញុំ វាយខ្ញុំ និង បំផ្លាញខ្ញុំគ្រប់យ៉ាង ទាំងដែលខ្ញុំ និង គាត់ត្រឹមជាសង្សាររស់នៅជាមួយគ្នាប៉ុណ្ណោះ ប៉ុន្តែមិនបានរៀបការ ឬក៏សែនឱ្យម៉ែឪដឹងឮ និង ស្គាល់នៅឡើយទេ ប៉ុន្តែគាត់ហ៊ានណាស់ ហ៊ានវាយខ្ញុំ និង ធ្វើបាបខ្ញុំ។ រយៈពេល ១ ឆ្នាំមកនេះ ខ្ញុំទ្រាំឆ្អែតឆ្អន់ហើយ ខ្ញុំក៏បានរត់គេចពីគាត់មកធ្វើការនៅកំពង់សោម ប៉ុន្តែគាត់នៅតែតាមរករឿងដល់កន្លែងធ្វើការ ព្រមទាំងគំរាមសម្លាប់ខ្ញុំថែមទៀត បើថ្ងៃក្រោយទៅខ្ញុំមានបញ្ហាអីគឺម្នាក់ហ្នឹងជាអ្នកធ្វើបាបខ្ញុំ ថ្ងៃស្អែកពេលព្រឹក ខ្ញុំនឹងទៅដាក់ពាក្យបណ្តឹងហើយព្រោះគាត់បានគំរាមខ្ញុំច្រើន»៕
