ទីបំផុតយន្តហោះចម្បាំង B-2 Spirit ដែលល្បីមានសមត្ថភាពខ្លាំង កំពូលបំបាំងកាយ គ្មានប្រពន្ធ័ Radar ណាមួយអាចចាប់រលកសញ្ញាវាបាន ត្រូវបានអាមេរិកប្រើវាយប្រហារដោយជោគជ័យនៅទីតាំងនុយក្លេអ៊ែរអ៊ីរ៉ង់។ នេះបើតាម ប្រធានាធិបតីអាមេរិក លោក ត្រាំ បានសរសេរបង្ហោះនៅលើបណ្តាញសង្គម។
បើតាមសារព័ត៌មាន New York Post យន្តហោះចម្បាំង B-2 ក្រៅពីមានសមត្ថភាពខ្ពស់ គ្មានគូណាអាចប្រជែងហើយនោះ នៅខាងក្នុងយន្តហោះក៏បានរៀបចំបំពាក់មកជាមួយ បង្គន់ មីក្រូវ៉េវ និង ទូរទឹកកក សម្រាប់ត្រៀមសម្រន់ ក៏ដូចជាផ្តល់ភាពងាយស្រួលដល់ពីឡុត ក្នុងពេលធ្វើដំណើររយៈពេលយូរផងដែរ។
ជាក់ស្តែង នៅពេលចេញចម្បាំងពីឡុតនឹងត្រូវជាប់នៅក្នុងកាប៊ីនយន្តហោះដល់ទៅ ៣៧ ម៉ោង ដោយហោះហើរពីរដ្ឋ Missouri សហរដ្ឋអាមេរិក ទៅកាន់អ៊ីរ៉ង់ ហើយត្រលប់មកវិញ។ មានន័យថា យន្តហោះត្រូវហោះហើរទៅមកដោយមិនមានចុះចតតាមផ្លូវឡើយ។
ចំពោះការបំពាក់ទូរទឹកកកខ្នាតតូច និង ម៉ាស៊ីនមីក្រូវ៉េវ គឺធ្វើឡើងដើម្បីប្រាកដថា ពីឡុតអាចរក្សាការហូបអាហារបានគ្រប់គ្រាន់ និង ផ្ចង់ស្មារតីបានល្អ។ ដូចទៅនឹងយន្តហោះដទៃដែរ យន្តហោះ B-2 បំពាក់បង្គន់ដើម្បីឱ្យពីឡុតបានបន្ទោបង់។ លើសពីនេះ ក៏មានកន្លែងទំហំសមល្មមអាចឱ្យពីឡុតទម្រេតខ្លួនសម្រាក ខណៈពីឡុតផ្សេងទៀតជាអ្នកបើកបរ។
គួរឱ្យដឹងដែរថា យន្តហោះ B-2 បានចេញបម្រើការដំបូងនៅក្នុងឆ្នាំ ១៩៩៧ ហើយយន្តហោះនីមួយៗមានតម្លៃច្រើនជាង ២ ពាន់លានដុល្លារ។ កងទ័ពអាកាសអាមេរិកមានកងយន្តហោះនេះចំនួន ១៩ គ្រឿង បន្ទាប់ពីបាត់បង់មួយគ្រឿងក្នុងការធ្លាក់យន្តហោះក្នុងឆ្នាំ ២០០៨ ៕
ប្រភព៖ NYP
