លោកជំទាវ ចម និម្មល ត្រូវបានមហាជនចាត់ទុកស្ត្រីខ្លាំង ស្ត្រីគំរូ និង ជាស្ត្រីដ៏មានឥទ្ធិពលនៅក្នុងសង្គម ដែលបច្ចុប្បន្នលោកជំទាវកំពុងកាន់តំណែងធំនៅក្នុងជួររដ្ឋាភិបាល ជារដ្ឋមន្ត្រីក្រសួងពាណិជ្ជកម្មនៅកម្ពុជា។ បើតាមបទសម្ភាសជាមួយទស្សនាវដ្តីអន្តរជាតិ Prestige នៅក្នុងជីវិតលោកជំទាវ លោកជំទាវបានឱ្យភាពសំខាន់ចម្បងទៅលើចំណុចពីរ៖ ទី១ របៀបរស់នៅសុខភាពល្អ (Healthy Lifestyle) ដែលជាគន្លឹះធ្វើឱ្យប្រើសើរទាំងផ្លូវកាយ និង ផ្លូវចិត្ត។ ចំណែកទី ២ អាចផ្តល់បរិយាកាសជំរុញឱ្យរីកចម្រើន (nurturing environment) សម្រាប់ក្រុមគ្រួសារ និង ក្រុមការងារ។ លោកជំទាវ និយាយថា៖ «ខណៈដែលខ្ញុំមានស្វាមី កូន ឪពុកម្តាយ និង បងប្អូនបង្កើត ខ្ញុំត្រូវតែបែងចែកពេលឱ្យស្មើគ្នា ដើម្បីជាផ្នែកមួយនៃជីវិតរបស់ពួកគេ។»
នៅពេលនិយាយដល់ស្ទាយ៌រៀបចំខ្លួនវិញ លោកជំទាវថាខ្លួនមិនមែនជាអ្នកសម្ភារនិយមនោះទេ ប៉ុន្តែលោកជំទាវចូលចិត្តស្ទាយ៌បែបទាន់សម័យ អេឡហ្គង់ និង ទំនើប។ ចំណង់ចំណូលចិត្តផ្ទាល់ខ្លួនរបស់លោកជំទាវ គឺជាការលាយបញ្ចូលគ្នានូវ អាកប្បកិរិយា គុណភាព ការជឿជាក់លើខ្លួនឯង និង ភាពពិតប្រាកដ។ បើទោះភាគច្រើន លោកជំទាវប្រើសម្លៀកបំពាក់ផ្លូវការទៅធ្វើការ តែលោកជំទាវក៏ផ្លាស់ប្តូរស្ទាយ៌ទៅតាមឱកាសខុសៗគ្នាផងដែរ។ លោកជំទាវថាសម្លៀកបំពាក់ឯកសណ្ឋានធ្វើការ ធ្វើឱ្យលោកជំទាវមានទំនុកចិត្ត និង មានអំណាច។
វ័យជាង ៤០ ឆ្នាំទៅហើយក្តី ប៉ុន្តែសម្រស់លោកជំទាវមើលមកពិតជាក្មេងវ័យ ដូចទៅនឹងស្ត្រីវ័យជាង ២០ ឆ្នាំ។ ចំពោះការថែរក្សាសម្រស់ លោកជំទាវបង្ហើបថា លោកជំទាវប្រើផលិតផលថែរក្សាសម្រស់តិចតួចបំផុត។ ភាពស្រស់ស្អាតសម្រាប់លោកជំទាវ គឺមិនមែនទាល់តែចំណាយពេលច្រើនម៉ោងធ្វើការតុបតែងមុខនោះទេ តែវាជាអ្វីដែលធ្វើទៅសមរម្យ។ តួយ៉ាង សម្រាប់លោកជំទាវផ្ទាល់ បើចង់ឱ្យខ្លួនមើលមកក្មេងជាងវ័យ លោកជំទាវគ្រាន់តែទម្លាក់សក់ចុះជាការស្រេច។ ដោយឡែកនៅកន្លែងធ្វើការ ភាគច្រើនលោកជំទាវលើកសក់ឡើងឱ្យផុតមុខ ដើម្បីមើលមកសមរម្យ និង កាត់បន្ថយការរំខាន៕
ប្រភព៖ Prestige
