មហាជន ជាពិសេសយុវវ័យនិយមទស្សនាការផលិតមាតិកា ច្បាស់ជាបានស្គាល់មកហើយកញ្ញា MPJ KH ដែលមានឈ្មោះពិតថា ហង្ស ម៉ាន់នី។ ក្នុងនោះ ក្រោយពីក្លាយខ្លួនជាអ្នកផលិតមាតិកា និង សាងកេរ្តិ៍ឈ្មោះមួយរយៈធំ កញ្ញា ហង្ស ម៉ាន់នី ក៏មានទីផ្សារការងារច្រើន ដោយរូបនាងក៏ត្រូវបានបណ្តាក្រុមហ៊ុនមួយចំនួនជ្រើសរើសជាទូតសុឆ្ឆន្ទៈទៀតផង។
ងាកមកកាន់ជីវិតឯកជន ពាក់ព័ន្ធនឹងរឿងបេះដូងឯណោះវិញ កន្លងមក កញ្ញា ហង្ស ម៉ាន់នី មិនដែលបង្ហើបថាមានគូស្នេហ៍នោះឡើយ ដោយបានត្រឹមអ្នកគាំទ្រធ្លាប់ចាប់ផ្គូផ្គងនាងនឹងតារាប្រុសចំនួន ២ រួមមាន អ្នកផលិតមាតិកាប្រជាប្រិយលោក សុភារាជ និង តារាសម្តែងប្រុស ម៉ក់ ឈុនលី។ យ៉ាងណាមិញ មួយរយៈក្រោយនេះ ក៏ហាក់ស្ងប់ស្ងាត់ទៅវិញ។
ដោយឡែក ស្រាប់តែមួយរយៈក្រោយនេះ អ្នកលេងបណ្តាញសង្គមហ្វេសប៊ុក ជាពិសេស នៅលើ Tik Tok កំពុងចាប់អារម្មណ៍នឹងភាពស្និទ្ធស្នាល ព្រមទាំងសារនៅរាល់វីដេអូ និង ការបង្ហោះរបស់កញ្ញា ហង្ស ម៉ាន់នី ជាមួយនឹងស្រីស្អាត ពៅ ពិសី ដូចជាផ្អែមល្ហែមខ្លាំង។
យ៉ាងណាក៏ដោយ ទំនាក់ទំនងរបស់ស្រីស្អាតទាំង ២ នេះ យ៉ាងណាក៏នៅមិនទាន់ច្បាស់លាស់ ខណៈអ្នកគាំទ្រក៏ចាប់ផ្តើមបង្ហាញការគាំទ្រដល់កញ្ញា ហង្ស ម៉ាន់នី និង កញ្ញា ពៅ ពិសី ឱ្យមានទំនាក់ទំនងលើសពីមិត្ត៕
