ពិតជាធ្វើឱ្យមហាជនមានការភ្ញាក់ផ្អើល និង មានការសោកស្តាយជាខ្លាំង ក្រោយពីដឹងដំណឹងថាតារាស្រី Kim Sae Ron បានបាត់បង់ជីវិតទៅក្នុងវ័យ ២៤ ឆ្នាំ កាលពីថ្ងៃទី ១៦ ខែកុម្ភៈ ឆ្នាំ ២០២៥ កន្លងទៅនេះ នៅក្នុងផ្ទះរបស់នាងផ្ទាល់។
តាមព័ត៌មានបានឱ្យដឹង មិត្តភក្តិរបស់ Kim Sae Ron បានប្រទះឃើញនាងដេកស្លាប់នៅក្នុងផ្ទះរបស់នាងនា Seongdong-gu ទីក្រុងសេអ៊ូល ហើយក៏បានធ្វើការផ្តល់ដំណឹងទៅកាន់ប៉ូលិស។ ប៉ូលិសបានធ្វើការស៊ើបអង្កេតទៅលើការស្លាប់របស់នាង ហើយបានឱ្យដឹងថាវាគ្មានស្លាកស្នាមដែលបង្ហាញពីឃាតកម្មឡើយ។ លុះដល់ថ្ងៃទី ១៧ ខែកុម្ភៈ ឆ្នាំ ២០២៥ នេះ ទើបខាងប៉ូលិសបានបញ្ជាក់ឱ្យដឹងច្បាស់ថា ករណីស្លាប់របស់នាងគឺបណ្តាលមកពីការសម្លាប់ខ្លួន ហើយគ្មានទាក់ទងនឹងរឿងឃាតកម្មនោះទេ។
យ៉ាងណាមិញ មហាជននៅតាមបណ្តាញសង្គម បាននាំគ្នាបញ្ចេញការសោកស្តាយយ៉ាងច្រើនចំពោះការបាត់បង់ជីវិតរបស់នាង ជាពិសេសពួកតារាៗរួមការងារជាច្រើនក៏បានចូលរួមសោកស្តាយ ដោយការផ្ញើកម្រងផ្កាទៅបុណ្យសពរបស់នាងផងដែរ៕
ប្រភព៖ PinkVilla
