ជាការពិតណាស់ មហាជនតាមដានពីតារាស្រី និង គ្រូគុនល្បុក្កតោ កញ្ញា ពេជ្រ ចរណៃ ច្បាស់ជាបានជ្រាបមកហើយពីរឿងរ៉ាវស្មានមិនដល់ធ្លាប់កើតឡើងចំពោះនាងកញ្ញា ដែលបានឆះហាង និង សាលាគុនកាលពីអំឡុងខែមិថុនា ឆ្នាំ ២០២៥ កន្លងទៅ បណ្តាលឱ្យខាតបង់ប្រាក់កាក់ជាច្រើនម៉ឺនដុល្លារ។
កាលនោះ ក្រោយភ្លើងឆេះហាងអស់ កញ្ញា ពេជ្រ ចរណៃ មិនត្រឹមតែខាតបង់លើការរៀបចំហាងទាំងអស់នោះទេ នាងថែមទាំងត្រូវទទួលបន្ទុកចំណាយលុយច្រើនជាងពេលរៀបចំហាងទ្វេដង ដើម្បីជួសជុលសាងសង់ផ្ទះជួលឱ្យម្ចាស់គេឡើងវិញ។
យ៉ាងណាក៏ដោយ ក៏ព្រោះតែការមិនបោះបង់ ដោយទទួលបានទាំងការផ្តល់កម្លាំងចិត្តផង ជួយជ្រោមជ្រែងជាថវិកាផង និង ប្រឹងប្រែងបន្តពីសមត្ថភាពខ្លួនឯផងនោះ កញ្ញា ពេជ្រ ចរណៃ និង គូស្នេហ៍ បានប្រឹងប្រែងបន្តស្តារហាង និង សាលាគុនល្បុក្កតោបានឡើងវិញហើយ។
ជាក់ស្តែង នៅថ្ងៃទី ០១ ខែតុលា ឆ្នាំ ២០២៥ នេះ កញ្ញា ពេជ្រ ចរណៃ បានបើសម្ពោធជាផ្លូវការហើយ នូវហាង និង សាលាគុនល្បុក្កតោរបស់កញ្ញា ដោយទទួលបានការអបអរជាច្រើនពីសំណាក់មហាជនអ្នកគាំទ្រ និង មិត្តទាំងក្នុង ក្រៅសិល្បៈ។ ទន្ទឹមនឹងការអបអរសាទរនោះ កញ្ញា ពេជ្រ ចរណៃ ក៏ទទួលបានពាក្យសរសើរជាច្រើន ចំពោះការមិនបោះបង់ និង ព្យាយាមរបស់តារាស្រីរូបនេះ ក៏ព្រោះតែក្តីស្រឡាញ់ ជាពិសេសនោះ គឺសាលាគុនល្បុក្កតោ ដែលបានរួមចំណែកក្នុងការចែករំលែកពីគុនខ្មែរទៅដល់សិស្សប្អូនជំនាន់ក្រោយ៕
